Raġel mill-Filippini ta’ 48 sena residenti San Pawl il-Baħar sfortunatament tilef ħajtu fl- Isptar Mater Dei, wara li kien involut f’inċident tat-traffiku f’Raħal Ġdid.
Kienu għall-ħabta tal-4:15 p.m xħin il-Pulizija ġiet infurmata permezz ta’ telefonata li kien hemm bżonn l-assistenza tagħha fi Triq l-Irvellijiet 1958, f’Raħal Ġdid minħabba li kienet seħħet ħabta.
Il-Pulizija tad-Distrett marru mill-ewwel fuq il-post u minn investigazzjonijiet preliminari li saru rriżulta li seħħet ħabta bejn vettura tal-għamla Land Rover Discovery, li kienet qed tinstaq minn raġel ta’ 37 sena residenti Raħal Ġdid, u mutur tal-għamla Honda, li kien qed jinstaq mill-Filippin.
Fuq il-post issejjaħ tim mediku li ta l-ewwel għajnuna u ambulanza li ħadet lix-xufier tal- mutur l-Isptar Mater Dei għall-kura meħtieġa, iżda sfortunatament ir-raġel ġie ċċertifikat mejjet ftit tal-ħin wara.
Bil-każ ġiet infurmata l-Maġistrat tal-Għassa Dr Natasha Galea Sciberras li ħatret diversi esperti sabiex jassistuha fl-Inkjesta li ġiet appuntata.
L-investigazzjonijiet tal-Pulizija tad-Distrett ta’ Raħal Ġdid rigward dan il-każ għadhom għaddejjin.
