Aktar minn 70,000 persuna nqatlu mill-Forzi Iżraeliti minn meta bdiet l-offensiva fuq il-Medda ta’ Gaża. Ħabbar dan il-Ministru tas-Saħħa tal-Grupp Ħamas li qal li minkejja kull waqfien mill-ġlied xorta waħda Iżrael għadu joqtol aktar Palestinjani.
Skont Iżrael minn żmien għal żmien komplew jwettaq aktar attakki mill-ajru hekk kif qal li jkun hemm suspetti jew inkella indikazzjoni li l-grupp Ħamas ikun se jwettaq xi attakki.
Nhar is-Sibt li għadda Iżrael qatel żewġt itfal subien, Fadi u Juma Abu Assi li kienu qegħdin jiġbru xi injam biex ikunu jistgħu jsaħħnu djarhom. Iżrael wettaq attakk fuqhom permezz ta’ drone.
Il-midja internazzjonali qiegħda tirraporta li dawn iż-żewġt itfal kienu qegħdin jiġbru l-injam biex iżommu kamra sħuna fejn hemm missierhom rikoverat.
Min-naħa tiegħu Iżrael qal li dan l-attakk twettaq minħabba li t-tfal kienu “suspettati” hekk kif qasmu dak li sejħu “l-linja s-safra”.
Intant, il-Ministru tas-Saħħa tal-Ħamas qal li mill-10 ta’ Ottubru li għadda meta kien hemm waqfien mill-ġlied inqatlu 350 persuna oħra.
Aktar minn hekk, eluf kbar ta’ Palestinjani qegħdin jgħixu f’kundizzjonijiet miżeri hekk kif djarhom spiċċaw ġebla fuq ġebla wara attakki minn Iżrael. Huma qegħdin jgħixu f’tined li twaqqfu apposta, iżda l-kundizzjonijiet tagħhom huma ħżiena ħafna.
S’issa ma hemm l-ebda indikazzjoni meta Gaża se tkun qiegħed tinbena mill-ġdid.
