Issa li wasal biex jibda l-istaġun tas-sajf l-MSPCA fuq il-midja soċjali enfasizzat ir-riskji li jistgħu jgħaddu minnhom l-annimali domestiċi jekk tħallihom f’ċertu postijiet fl-eqqel tas-sħana.
Eżempju li saħqet fuqu huwa meta tħalli annimal domestiku fil-karozza, anke bi twieqi miftuħin, tista’ toħloq sitwazzjoni fatali. Sitt minuti jkunu biżżejjed biex kelb jew qattus isofri minn heat stroke u tħallih mejjet.
L-MSPCA kompliet tenfasizza li jekk persuni ma jistgħux jieħdu l-annimali magħhom u jħalluhom f’post frisk u sigur, ikun aħjar għall-annimali li jibqgħu d-dar fejn huma jħossuhom kuntenti.
Kull sid għandu jkun responsabbli u jkun ċert li l-annimali għandhom skutella bl-ilma frisk u post fid-dar fejn huma jkunu għall-frisk.
Meta x-xemx tkun fl-aqwa tagħha m’għandekx tħallihom jimxu fis-sħana għax jista’ jkun ta’ periklu għall-ġilda tagħhom u anke jinħarqu bix-xemx. Mhuwiex sigur li tħallihom fuq il-bjut jew fil-btieħi anke jekk ikollok kamra għaliex jekk din tkun esposta għax-xemx ikun kollu għalxejn.
Għalhekk huwa importanti ħafna li f’dawn iż-żminijiet nagħtu attenzjoni żejda biex inkunu ċerti li l-annimali mhumiex ibatu s-sħana.
