Raġel ta’ 25 sena mill-Pakistan intbagħat sitt xhur ħabs wara li ammetta li pprova jitlaq minn Malta lejn l-Italja b’dokument falz, ‘permesso di soggiorno’.
Ihtisham Ihtisham, li f’Malta huwa residenti San Pawl il-Baħar, kien arrestat nhar it-Tnejn li għadda, għall-ħabta tas-6.40 p.m. mill-Pulizija tal-Ajruport hekk kif kien qed jippjana biex imur fil-belt ta’ Venezja.
Għall-ewwel huwa kien ammetta biss l-akkuża ta’ falsifikazzjoni ta’ dokument u mhux li kellu fil-pussess tiegħu passaport u li ffalsifikah u dan għaliex skont id-difiża huwa ma kienx fil-pussess ta’ passaport, iżda ta’ dokument.
L-Ispettur Lara Butters li ressqet lill-Pakistani qalet li l-liġi tinkludi dokumenti, passaporti u dak kollu li għandu x’jaqsam ma’ permess ta’ żbarkazzjoni. Finalment l-akkużat ammetta l-akkużi kollha miġjubin kontrih u ġie kundannat sitt xhur ħabs.
L-Avukat Franco Dalli deher għal Ihtisham.
