Sparatura li seħħet f’parkeġġ fis-sigħat li għaddew qrib knisja f’lowa fl-Amerka ħalliet tliet persuni mejta — żewġ tfajliet u r-raġel li wettaq ir-reat.
Fi stqarrija li ta wieħed mir-rappreżentanti tal-knisja, huwa qal li l-vittmi huma membri żgħażagħ tal-komunità tal-knisja. Żied jgħid ukoll li proprju lbieraħ kienu hemm għall-ewwel laqgħa tagħhom għal dan is-sajf.
S’issa għadu mhux magħruf l-età tal-vittmi. L-indikazzjonijiet huma li r-raġel li wettaq l-isparatura spara lilu nnifsu.
Il-knisja wriet is-sogħba tagħha u qalet li qed titlob għal kull min kien milqut f’din it-traġedja speċjalment għall-familji tal-vittmi.
