Madwar 60 persuna tilfu ħajjithom fi splużjoni kbira ġewwa minjiera tad-deheb fil-Burkina Faso. Din l-isplużjoni seħħet hekk kif bombi dynamite, li kienu maħżuna fil-viċin, għal xi raġuni ħadu n-nar. Qrib din il-minjiera hemm suq u kien hawn fejn il-maġġoranza tal-persuni tilfu ħajjithom.
Din l-isplużjoni, li wkoll feriet għexieren ta’ persuni, kienet tant qawwija li għadd ta’ siġar inqalgħu mill-għeruq u xi djar saħansitra ġġarrfu. Minnufih il-prosekutur reġjonali fetaħ investigazzjoni dwar dan il-każ. Hu mifhum li s’issa l-pulizija arrestat persuna b’rabta ma’ dan il-każ u dan qiegħed jiġi interrogat.
Burkina Faso huwa wieħed mill-ikbar produtturi tad-deheb ġewwa l-Afrika. Il-maġġoranza tal-minjieri huma mħaddma minn kumpaniji internazzjonali, iżda jeżistu wkoll numru ta’ minjieri li mhumiex uffiċjali u dawn ħafna drabi jiskapulaw ir-regolamentazzjonijiet li suppost il-minjieri jkollhom jonoraw.