Iċ-champion nazzjonali tal-isquash ta’ Malta, Colette Sultana, rebħet l-ewwel titlu tagħha fit-turnew tal-Professional Squash Association 3K dan il-weekend, wara li ħarġet rebbieħa fil-Northern Territory 2025 PSA Open li sar f’Darwin, l-Awstralja.
Matul il-ġimgħa, Sultana tat prestazzjoni eċċellenti kontra kontendenti internazzjonali. Hija avvanzat għall-finali wara li għelbet lil Tansyn Noble tal-Awstralja (11-7, 11-2, 11-3) fil-kwarti tal-finali, u lil Ye Won Jang tal-Korea t’Isfel (11-4, 11-7, 11-5) fis-semifinali.
F’finali drammatika u missielta ħafna, Sultana għelbet lil Chaewon Song tal-Korea t’Isfel f’inkontru eċċitanti ta’ ħames logħbiet (6-11, 11-9, 11-5, 8-11, 15-13) biex assigurat ruħha bil-kampjonat u l-ewwel titlu tagħha tal-PSA 3K.
Colette Sultana hija appoġġjata mill-Kumitat Olimpiku Malti (MOC), SportMalta, u Malta Squash.
Din ir-rebħa timmarka pass importanti fil-karriera professjonali ta’ Sultana u tenfasizza l-istatus dejjem jikber tagħha fiċ-ċirkwit internazzjonali tal-isquash.
