Stefan Azzopardi, Nadine de Wilde jiksbu r-reħba fit-30 Malta International Challenge Marathon

It-30 Edizzjoni tal-Malta International Challenge Marathon ġiet fi tmiemha l-Ħadd filgħodu fil-Qawra, meta l-aħħar stadju tal-avveniment mifrux fuq tlett ijiem ikkonkluda b’nofs maratona.

Il-korsa ta’ 21km kienet minsuġa f’varjetà ta’ terren, minn taħlita ta’ meded ċatti, veduti panoramiċi tal-baħar, u għoljiet weqfin li taw l-isfida mistennija lill-parteċipanti.

Filwaqt li l-ewwel jumejn kienu kkaratterizzati minn kundizzjonijiet tat-temp ħżiena – b’riħ ta’ forza 6 u xita qawwija – l-istadju finali wera li kien ferm aħjar bix-xemx tiddi għal ħafna mill-ħin.

B’distakk ta’ ftit sekondi bejn l-ewwel tlett atleti – Aaron Mifsud, Stefan Azzopardi u Christian Micallef – l-aħħar stadju it-tellieqa kienet ser tiddermina r-rebbieħ.

Aktar kmieni fit-tellieqa Azzopardi, li rritorna għat-tiġrijiet wara perjodu ta’ injury, u Micallef marru fuq quddiem fejn ipprovaw jżomm distakk fuq Mifsud. Fl-iktar parti iebsa tal-korsa, l-Għolja tal-Wardija, Micallef ħa l-vantaġġ b’Azzopardi eżatt warajh u Mifsud ftit passi warajhom. Dawn il-pjazzamenti nżammu sal-aħħar meta Micallef kien l-ewwel li temm in-nofs maratona. Fit-tieni u t-tielet post spiċċaw Azzopardi u Mifsud rispettivament.

Is-sekondi kumulattivi minn kull stadju kellhom rwol kruċjali fil-ħinijiet ġenerali li rriżultaw f’Azzopardi jieħu r-rebħa. Fit-tieni post kien Aaron Mifsud, filwaqt li Christian Micallef ikkompleta l-podju tal-irġiel.

Intant, fit-tellieqa tan-nisa, Nadine de Wilde kompliet tagħti prestazzjoni determinata mmirata lejn l-ewwel post fuq il-podju. De Wilde kellha prestazzjoni konsistenti. Hi tilfet ir-rebħa tal-ewwel stadju wara li ħadet dawra ħażina fl-aħħar parti tal-korsa. Rebħa fit-tieni stadju poġġitha fuq il-possibiltà ta’ rebħa ġenerali. u distakk ta’ kważi tliet minuti fuq Caroline Ciappara li tinsab fit-tieni post. Fit-tielet post kienet Clara Attard. It-tliet nisa kienu dehru b’mod konsistenti fuq kull podju tat-tellieqa u kienu favoriti biex jieħdu posthom fuq il-podju tal-klassifika ġenerali

Il-Malta International Challenge Marathon laqgħet ukoll għadd ta’ atleti barranin li ġejjin mill-Olanda, l-Estonja, l-Afrika t’Isfel u l-Kanada.

It-trofej ġew ippreżentati lir-rebbieħa fi tmiem l-avveniment fil-preżenza tal-President tal-Club Ray Grech u l-uffiċjali Joseph Farrugia u l-Fundatur tar-Race Barry Whitmore.

“Iċ-Challenge mhix biss maratona; hija tlett ijiem mimlija sfidi iżda wkoll ħbiberiji.  Maratona mifruxa fuq tlett tijiem tintroduċi sett distintiv ta’ sfidi, li jikkompeti mal-intensità ta’ maratona f’ ġurnata waħda. Madankollu, dak li jiddistingwi ċ-Challenge huwa l-opportunita li tipprovdi lill-atleti biex joħolqu konnessjonijiet dejjiema. Ix-xhieda ta’ l-atleti jieqfu fit-tul wara li spiċċaw, jaqsmu l-istejjer u l-esperjenzi, hu eżempju tar-rabta unika maħluqa fuq il-korsa. Aħna kburin ħafna bihom kollha! “ ikkummenta Ray Grech, President Birkirkara St Joseph Sports Club.

Is-Segretarju tal-Klabb,  Euchar Camilleri esprima s-sodisfazzjon tiegħu għall-eżitu ta’ din l-edizzjoni u rringrazzja lil dawk kollha involuti b’mod partikolari lill-Kunsilli Lokali tas-Siġġiewi, Wied il-Għajn u San Pawl il-Baħar, lill-LESA, lill-uffiċjali tat-tellieqa u lill-marshalls.

L-avveniment finali għall-Kalendarju tat-Tlielaq tal-klabb għal din is-sena se jsir fit-13 ta’ Diċembru, meta se jospita t-Tlielaq tal-Eurosport Fleur-de-Lys. Ir-reġistrazzjoni hija miftuħa online fuq https://bsj.mt/event/2023-bsj-fleur-de-lys-road-races/

Klassifika Ġeneralo

Trofej Gruppi tal-Eta