Kif bdiet l-imħabba tiegħek lejn il-football?
Kien missieri li nissilli din l-imħabba lejn dan l-isport tant affaxxinanti. Kull fejn kien imur kien jeħodni miegħu u d-dar konna nitkellmu kważi dejjem fuq il-football.
Aktar tard huwa kien ukoll il-president ta’ club minn Ruma bl-isem ta’ Tre Fontane. Il-ground fejn kienu jitħarrġu l-players jinsab ferm viċin id-dar fejn għadhom joqogħdu s’issa ommi u missieri u minn hemm tista’ tgħid li bdejt ninvolvi ruħi iktar fejn għandu x’jaqsam f’din il- logħba tal-football.
X’tiftakar meta kont tilgħab bħala player tal-football?
Niftakar li ma tantx domt nilgħab ħafna football minħabba li iktar kont mixħut bħala coach.
Iddeċidejt li ndendel iż- żarbun tal-football kmieni lejn l-aħħar tal-għoxrinijiet.
Għalkemm xorta kont nilgħab football 5-a-side, ta’ 28 sena bdejt inħarreġ team taż-żgħażagħ minn Aquila fir-reġjun ta’ Abruzzo.
Niftakar li kont ferm għal qalbi fi rwol ta’ coach u aktar m’għadda ż-żmien aktar bdejt niżviluppa l-ħiliet tiegħi.
F’dan il-club ta’ Aquila kien hemm ukoll ħija u flimkien konna mmexxu dan it-team b’tant dedikazzjoni. Kienu żminijiet verament sbieħ li għaddejna minnhom u li ħadt ħafna esperjenza.
X’differenza tara bejn li tkun player u li tkun coach?
Hemm differenza kbira bejn dawn iż-żewġ rwoli. Meta tkun player, int xogħlok hu li titħarreġ dejjem, iżżomm ruħek fiżikament tajjeb u li tilgħab il-logħba tipika tiegħek.
Meta tkun coach, l-affarijiet huma ferm differenti. Jien ngħid li int coach għal 24 siegħa fil-ġurnata għax ir-responsabbiltá li jkollok hi waħda kbira.
Trid tfittex is-soluzzjoni għal dak li jinqala’ u waqt il-logħba trid tieħu deċiżjonijiet ta’ malajr sabiex jekk tkun qed titlef, tkun kapaċi ddawwar il-logħba.Finalment għandek grupp ta’ players b’karattru differenti u li int trid tgħaqqadhom bħala team.
Jien inħoss li r-rwol ta’ coach hu vokazzjoni u li tkun ġo fik.
Tista’ tagħtina d-dettalji dwar it-timijiet li kkowċjajt qabel ma bdejt din il-kariga f’Malta?
Ilni nikkowċja mis-sena 1997, jiġifieri, 25 sena. Kif għedtlek bdejt ma’ Aquila għalkemm matul il-karriera tiegħi kelli esperjenzi wkoll ma’ Isernia, Potenza, Frosinone, Tivoli, Cosenza, Messina U19, Gela, Barletta, Cassino, Latina, Salernitana, Catanzaro, Viterbese, Sambenedettese u Racing Fondi, f’dik l-ordni.
Madankollu naħseb l-iktar mument li niftakar matul din il-karriera tiegħi kien proprju meta kkowċjajt lil Latina Calcio minħabba li rnexxielna niksbu promozzjonijiet konsekuttivi minn Serie C2 għal Serie C1 għal Serie B.
Minkejja kollox il-president Claudio Lotito riedni mmur ma’ Salernitana u għalhekk ma kellix iċ-ċans immexxi lit-team fis-Serie B.
Semmejt lill-president ta’ Lazio, Claudio Lotito. Kemm tafu personali lil dan il-bniedem?
Claudio Lotito huwa raġel li għandi rispett kbir lejh. Ilni nafu u għadni sal-lum il-ġurnata nkellmu. Hu xtaqni mmur nikkowċja lil Salernitana peress li kellu lil dan it-team taħt idejh u jien ma ridtx immur kontra r-rieda tiegħu.
Kif ġejt tikkowċja f’Malta?
L-ewwel u qabel kollox, kelli x-xewqa li jkolli l-ewwel esperjenza tiegħi barra minn Malta.
L-affarijiet ma tantx kienu daqshekk ikkumplikati minħabba li player li kelli ma’ Latina Calcio, Andrei Agius, mexxa l-kuntatt tiegħi mad-diriġenti ta’ Hibernians FC u minn hemm beda dan il-ftehim sabiex ġejt immexxi lit-team.
Ġejt fil-Gżejjer Maltin b’entużjażmu kbir u kont lest sabiex nagħti l-aqwa tiegħi u b’xorti tajba rnexxieli nagħmel dan.
Għalik personali, dan kien l-ewwel rebħ ta’ kampjonat ma’ Hibernians. X’ifisser għalik dan kollu?
Dan il-kampjonat ifisser ħafna għal dak kollu li għamilna matul dawn is- sentejn.
Is-sena l-oħra konna żvinturati li l-istaġun waqaf f’Marzu minħabba l-Covid-19 u għalhekk ma stajniex nagħtu l-isfida tagħna lil Hamrun Spartans sal-aħħar. Din is-sena riedna akkost ta’ kollox nirbħu dan il-kampjonat li jien ngħid kien wieħed ferm meritat.
Huwa kampjonat li niddedikah għall-familja Bezzina li tant tirsisti għal dan il-club, għall-partitarji akkaniti tagħna, għall-grupp ta’ players eċċezzjonali u anke għall-kumitat li rsista ħafna sabiex wasal dan is-suċċess.
Bħalma jgħidu dak li tiżra taħsad u hekk ġara. Ninsab grat ħafna għall-club ta’ Hibernians.
Kif tiġġudika l-livell tal- football Malti?
Jien narah il-livell tas-serie C fl-Italja. Qed nara iżda li l-football Malti żdied ħafna fil-livell u hemm taħlita ta’ plejers żgħażagħ Maltin u anke players stabbiliti barranin li qed jagħmlu l- logħob ferm aktar attraenti.
X’inhi l-opinjoni tiegħek dwar il-grounds fejn jintlagħbu l-logħob tal-ogħla kampjonat Malti?
Bla dubju li t-Tony Bezzina Stadium hi struttura verament sabiħa li tieħu gost tkun fiha.
Hu wieħed mill-aqwa faċilitajiet bħala club li hawn fil-gżejjer Maltin. Nemmen li aktar clubs jistgħu jinvestu sabiex ikollhom il-faċilitá tagħhom.
X’taħseb dwar il-livell tar-referees li jikkontrollaw il-logħob tal-kampjonat Premier?
Ngħid il-veritá ma dejjaqnix il-kontroll tar-referees matul dan l-istaġun. Jien anzi rajt li kien hemm progress kbir u l-livell qed ikompli jiżdied u din hi xi ħaġa tajba.
X’taħseb dwar l-esperjenza tagħkom fil-UEFA Champions League fl-istaġun li ġej?
Aħna se nerġgħu nippruvaw li naqtgħu figura tajba. Sfortunatament fil-bidu ta’ dan l-istaġun fil-logħba kontra Riga ġejna ppenalizzati b’deċiżjonijiet kontroversjali mir-referee għax nemmen li stajna navvanzaw aktar fil-kompetizzjonijiet Ewropej.
Se nagħtu l-aqwa tagħna sabiex immorru tajjeb.
X’inhu l-futur tiegħek ma’ Hibernians?
Jien se jiskadili l-kuntratt fl-aħħar ta’ dan l-istaġun u wara li jgħaddi kollox, se jkolli dak il-perjodu ta’ riflessjoni x’għandha tkun it-triq ‘il quddiem.
Nixtieqek tgħaddi l-aħħar messaġġ lill-partitarji numerużi ta’ Hibernians.
Minn hawn nixtieq nirringrazzjahom talli ġew jarawna f’ħafna mil-logħbiet li t-team kien involut fihom kemm fil-Kampjonat BOV Premier kif ukoll fl-Izibet FA Trophy.
Huma ġew dejjem jagħtu s-sapport tagħhom lill-players u kollha kemm aħna napprezzaw dak kollu li għamlu għalina.
Kienet okkażjoni sabiħa, is-Sibt 7 ta’ Mejju meta ġew bi ħġarhom fil-pjazza sabiħa ta’ Raħal Ġdid jifirħu bil-kbir għal dan is-suċċess.
Kont impressjonat b’dan kollu anke fil-mument meta dħalna fil-knisja u ħadna t-tazza hemmhekk.
Ċertament li qalbi se tibqa’ marbuta ħafna ma’ Raħal Ġdid minħabba li hawn nies verament dħulin u jgħinuk bl-aħjar mod li jistgħu!
