Il-player internazzjonali Malti tal-waterpolo Stevie Camilleri laħaq ftehim biex jingħaqad mal-club tas-Serie A1, Catania, ħabbar it-team Taljan fi stqarrija.
Stevie ilu aktar minn 14-il sena jilgħab fl-Italja u issa ddeċieda li jestendi aktar il-karriera tiegħu barra minn Malta billi laħaq ftehim biex jingħaqad ma’ Catania.
“Catania Nuoto tal-ġejjieni qed jibda jieħu forma, u qed jibda biex jagħmel dan permezz tal-attakkant u captain attwali tat-team nazzjonali Malti Steven Camilleri,” qal il-club Taljan fi stqarrija.
“Il-player Malti, li jaf sew il-kampjonat Taljan, kiseb suċċess kbir matul is-snin kemm fis-Serie A1 kif ukoll fl-A2, fejn skorja madwar 800 goal fiż-żewġ kategoriji.
“Fl-aħħar sentejn, Camilleri lagħab ma’ Muri Antichi fis-Serie A2, iżda l-esperjenza tiegħu fl-Italja u b’mod partikolari fl-aqwa serje tal-waterpolo nazzjonali Taljan ilha li bdiet iktar preċiżament ma’ Bogliasco fis-Serje A1 (2008-14), biex imbagħad ingħaqad ma’ Ortigia ukoll fis-Serie A1 (2015-17) u AS Roma Swimming fis-Serie A2 u A1 (2017-20).”
Il-club Taljan qal li kien ferħan li kiseb is-servizzi ta’ player li jiftaħar b’karriera internazzjonali li tiġbed l-għajn mat-team nazzjonali Malti wara li kien l-aqwa skorer fil-Kampjonati Ewropej tal-2016.
Camilleri qal lis-sit elettroniku uffiċjali tal-club Taljan li lest jirritorna fl-aqwa serje tal-kampjonat Taljan tal-waterpolo għall-istaġun 2022-23.
“Ninsab kuntent ħafna li se nsir parti minn Swimming Catania u ma nistax nistenna li nerġa’ nilgħab fl-aqwa serje tal-waterpolo Taljan,” qal Camilleri.
“Se npoġġi l-esperjenza u l-isforz tiegħi kollha għad-dispożizzjoni tat-team, bit-tama li niksbu suċċessi flimkien. Nirringrazzja lill-club kollu talli wera interess u riedni”.
Min-naħa tiegħu, il-coach ta’ Catania Giuseppe Dato qal li: “Stevie Camilleri huwa plejer li m’għandux bżonn introduzzjoni u żgur li se jkun qed jgħolli l-livell tekniku tat-team tagħna. L-esperjenza u l-kwalitajiet tiegħu se jkunu ta’ għajnuna kbira. Ilkoll nilqgħuh fostna b’ferħ kbir.”
Id-direttur sportiv ta’ Catania Giuseppe Leonardi faħħar il-kwalitajiet ta’ Camilleri.
“Ninsabu partikolarment kuntenti li lħaqna ftehim ma’ Stevie Camilleri, minħabba l-istorja importanti tiegħu mimlija suċċessi fil-waterpolo,” qal Leonardi.
“Nixtieq nemfasizza l-ewwelnett ir-rieda tiegħu li jintegra fi grupp omoġenju u koeżiv bħal tagħna. U ngħid dan għax fil-jiem li ltqajna, biex nipperfezzjonaw it-termini tal-ftehim, sibt xewqa kbira f’dan is-sens, b’għanijiet dejjem kondiviżibbli li jagħtuna riżultati pożittivi fil-kors tal-kampjonat li jmiss.
“Kampjonat li huwa mbassar li jkun diffiċli u ta’ sfida, iżda aħna nisnabu lesti għal dan.”
