Minn Cristian Muscat
Stevie Camilleri huwa wieħed mill-plejers l-aktar prominenti fil-waterpolo Malti, magħruf mhux biss għall-ħiliet sportivi tiegħu imma wkoll għall-karattru tiegħu fl-ilma. Captain attwali tat-tim nazzjonali ta’ Malta u figura ċentrali fil-klabb tiegħu, Neptunes WPSC, Camilleri ilu jagħmel marka fuq il-water polo Malti għal aktar minn għaxar snin.
Minn meta beda jilgħab mal-ewwel tim ta’ Neptunes fl-età ta’ 15-il sena, maż-żmien sar captain tat-tim nazzjonali u anke membru tal-istaff tekniku tal-istess tim, il-karriera tiegħu ġiet mimlija suċċessi u rekords personali li għal ħafna jibqa’ ta’ ispirazzjoni.
F’Malta, huwa rikonoxxut bħala l-plejer li skorja l-akbar numru ta’ gowls fl-aħħar Kampjonat Ewropew li sar f’Belgrad fis-Serbja, u fl-aħħar edizzjoni li saret f’Jannar 2026, Camilleri laħaq l-għan li jiskorja s-60 gowl tiegħu u jispikka f’dan ir-rekord li wettaq.
Barra minn hekk, fil-klabb tiegħu, Neptunes, kien element essenzjali fir-rebħ ta’ diversi titli tal-kampjonat u rebaħ l-unur ta’ ASA plejer tas-sena għal diversi drabi, inkluż fl-2007, 2011 u 2012, u b’hekk wettaq rekord ġdid għal dawk li rebħu l-unur b’mod ripetut.
Fil-ħajja professjonali tiegħu, Camilleri ukoll kellu esperjenza mat-timijiet Taljani ta’ RN Bogliasco u Nuoto Catania fil-Serie A1, fejn spiss kien fost l-aqwa skorer tal-league, juri kemm il-ħiliet tiegħu kienu apprezzati fuq livell internazzjonali. Il-ħidma tiegħu ma’ tfal u żgħażagħ permezz tas-S7even Waterpolo Academy tħalli impatt fuq il-ġenerazzjoni li ġejja, fejn jiffoka fuq l-iżvilupp ta’ talent u dedikazzjoni lejn l-isport.
Kif għedna, l-aħħar Kampjonati Ewropej kienu memorabbli għal Stevie u għat-tim nazzjonali ta’ Malta, li laħaq it-13-il post, riżultat li qatt qabel ma seħħ. Aħna ħadna intervista miegħu fejn kien ferm sodisfatt b’dak li rnexxielu jilħaq flimkien mat-tim nazzjonali ta’ pajjiżu.
“Verament kburi, onestament lħaqna l-għan tagħna,” qal Stevie waqt din l-intervista. “Iċ-ċirkustanzi jagħmlu dan ir-riżultat anke aktar importanti. Għalkemm kien hemm ftit episodi li ma kellniex kontroll fuqhom, ninsab kburi li kont parti minn dan.”
Bħala captain tat-tim, din kienet it-tielet darba li Camilleri mexxa lit-tim fil-Kampjonat Ewropew, u jiddeskrivi din l-edizzjoni bħala l-iktar sfida diffiċli. “Xi drabi anke xi kliem li ngħid lil sħabi jista’ jħalli xi ftit ta’ impatt, iżda dak li nipprova nwassal huwa l-eżempju,” spjega. “L-isforz massimu u l-konċentrazzjoni fuq dak li jiġri fil-ilma, mhux fuq dak li jiġri barra, huma dak li jfasslu t-tim. Ma kelli l-ebda miri personali li nbiddel, iżda kelli d-dmir li nissapportja lit-tim tiegħi, u hekk għamilt.”
Il-kontinwazzjoni ta’ suċċessi individwali kienet wkoll prominenti. Stevie laħaq it-tielet post fil-lista tal-aqwa skorer tal-finali, xi ħaġa li qabel ma ħaseb dwarha, billi fl-2016 kien l-aqwa skorer tal-istess kampjonat b’21 gowl f’7 logħbiet. “Ma kontx qed nagħti kas kemm nista’ niskorja gowls, xi drabi l-plejers tat-timijiet l-oħra lagħbu numru differenti ta’ logħbiet. Għalija, dak ma kienx importanti,” spjega. “Il-prijorità tiegħi kienet dejjem il-prestazzjoni tat-tim u li niksbu l-għanijiet tagħna.”
Stevie fakkar li l-kampjonati ta’ issa kienu differenti minn dawk ta’ 10 snin ilu. “L-akbar differenza kienet li din id-darba kellna miri ċari u pożizzjoni definita fejn ridna naslu. L-organizzazzjoni kienet perfetta, il-preparazzjoni tagħna wkoll, u kien ċar fejn ridna naslu. Kull ħaġa li kienet possibbli biex niksbu l-għan tagħna saret,” qal.
Din l-edizzjoni tat lil Stevie u lit-tim tiegħu sens ta’ sodisfazzjon ġdid, mhux biss minħabba r-riżultat, iżda wkoll minħabba l-mod kif ġew segwiti l-istruzzjonijiet kollha tal-kowċ Milan Cirovic, mill-preparazzjoni sal-wirja li taw bħala plejers Maltin. “Kont kburi li tajt is-servizz tiegħi lit-tim nazzjonali Malti.”
Filwaqt li Camilleri għadu jilgħab, l-attenzjoni tiegħu m’għadux biss li jiskorja imma wkoll fuq kif jippromovi l-isport. Bħala kaptan u kowċ tal-ġenerazzjoni żagħżugħa, il-messaġġ tiegħu huwa ċar: eżempju, dedikazzjoni u riżultat tat-tim qabel kollox. Huwa jemmen li dawn huma l-valuri li għandhom jgħaddu lil dawk li ġejjin wara fih u fil-water polo Malti b’mod ġenerali.
Minbarra l-prestazzjoni individwali, il-karriera ta’ Stevie hija marbuta ma’ tmexxija, ħidma u passjoni għall-isport li tgħaddi minn din il-ġenerazzjoni l-ġdida ta’ plejers li tiela’ u li kienet f’Belgrade. “Kull suċċess huwa ħidma kollettiva,” qal. “Meta tilgħab għall-pajjiż, l-isport jiġi qabel kollox u kull wieħed għandu jagħti l-aħjar tiegħu, kemm jekk fil-logħba kif ukoll barra.”
Stevie Camilleri ma jispikkax biss permezz tal-gowls u s-suċċessi individwali, iżda wkoll bħala simbolu ta’ tmexxija u dedikazzjoni għall-water polo f’Malta. Ir-riżultati tal-aħħar Kampjonat Ewropew, it-13-il post storiku, il-post fil-lista tal-aqwa skorers u l-preparazzjoni mill-aqwa tat-tim kollha, juru li l-isforz kollettiv u l-objettiv preċiż iħallu impatt sinjifikanti. Għal Stevie, il-kuraġġ, il-passat u l-preżent jingħaqdu biex joħolqu futur b’saħħtu għall-isport li tant iħobb u li tant għen lil Malta jispikka fuq ix-xena Ewropea.
Fil-fatt, il-messaġġ tiegħu huwa ċar: għalkemm il-kampjonati qed jinbidlu u l-isport jinbidel, il-valuri ta’ dedikazzjoni, eżempju u tmexxija jibqgħu l-istess. Għal Stevie Camilleri, li għadu jilgħab u jgħallem lill-plejers iktar żgħażagħ fl-istess ħin, dawn huma l-prinċipji li jagħmlu l-water polo Malti wieħed li jispikka fuq livell Ewropew u jgħaqqad il-passat, il-preżent u l-futur.