Studjurban rebaħ il-Premju tad-Deheb bħala Kontributur Lokali Kulturali fl-edizzjoni ta’ din is-sena tal-Malta Business Awards, rikonoxximent li mhux biss jiċċelebra l-proġetti individwali tal-kumpanija iżda wkoll jikkonferma kif ix-xogħol tagħha qed ikompli jwassal kontribut importanti lill-pajsaġġ urban ta’ Malta u jinfluwenza l-ħajja pubblika.
Imwaqqaf fl-2012, Studjurban huwa studjo ta’ arkitettura u disinn urban magħrufa għall-approċċ innovattiv tiegħu li jlaqqa’ l-ħarsien tal-wirt ma’ soluzzjonijiet urbani kontemporanji. Studjurban jispeċjaliżża fil-ħolqien ta’ spazji li jirriflettu l-kultura u li jżommu l-kwalitajiet uniċi tal-post filwaqt li jirrispondu għall-bżonnijiet tal-ħajja moderna ta’ llum.
Fost l-aktar proġetti riċenti ewlenin ta’ Studjurban hemm ir-rinnovazzjoni tal-pjazza tal-Mosta u aktar riċentement, ta’ Pjazza Vittoriosa fil-Birgu. Madankollu, skont Dr Antoine Zammit, il-fundatur ta’ Studjurban, dan il-premju jirrikonoxxi l-kontribut aktar wiesgħa tal-kumpanija fil-qasam tar-riċerka, il-politika u l-urbanizmu sostenibbli.
“Fil-ħidma tagħna f’ambjenti kumplessi li jkollhom wirt storiku, ix-xogħol tagħna jmur lil hinn mir-restawr u t-tisbieħ iżda nippruvaw inħeġġu sabiex jikber is-sentiment kulturali li jpoġġi liċ-ċittadini fiċ-ċentru ta’ kull proġett, fejn l-ispazju pubbliku dominat mill-karozzi jerġa’ jingħata lura lin-nies biex b’hekk nerġgħu nagħtu ħajja soċjali fl-ibliet u l-irħula tagħna.”
“Il-proġetti tagħna qatt ma huma biss dwar id-disinn iżda jżommu liċ-ċittadini, l-istorja u l-kultura ta’ kull post, b’mod li dawn tassew iservu lill-komunitajiet,” qal Dr Zammit.
Din il-filosofija tidher ċara fit-tmexxija ta’ Studjurban tal-proġett Slow Streets Malta, inizzjattiva nazzjonali li tkopri diversi lokalitajiet f’Malta u Għawdex, f’kollaborazzjoni mal-Assoċjazzjoni tal-Kunsilli Lokali, Transport Malta u awtoritajiet lokali.
Il-proġett japplika strateġija bbażata fuq ir-riċerka, li tagħmel użu minn miżuri permanenti u oħrajn temporanji ta’ mmaniġġjar tat-traffiku b’mod li jkun hemm tnaqqis ta’ karozzi u t-toroq jerġgħu jingħataw lura lin-nies.
“Slow Streets mhuwiex eżerċizzju ta’ disinn biss iżda tentattiv sabiex titwassal il-bidla soċjali li hemm bżonn,” josserva Dr Zammit.
“Din il-bidla sseħħ b’mod gradwali billi nagħtu lin-nies iċ-ċans li jesperjenzaw toroq mingħajr traffiku. Ftit ftit, il-mentalità qawwija dwar l-użu tal-karozzi akkost ta’ kollox qed nibdew inbiddluha ftit ftit.”
Il-proġett ifittex li jippromwovi l-mixi u li tingħata ħajja lin-negozji lokali u li jkun hemm iżjed ħajja komunitarja permezz tal-kunċett li jekk l-ispazji pubbliċi jitfasslu b’mod intelliġenti, titjieb i-ħajja ta’ kuljum fil-villaġġi.
Dawn kienu l-istess prinċipji li ġew implimentati dan l-aħħar fir-rinnovazzjoni ta’ Pjazza Vittoriosa fil-Birgu. Hawnhekk, il-karozzi kienu jokkupaw kważi 77% tal-pjazza prinċipali iżda wara r-riġenerazzjoni, aktar minn nofs l-ispazju reġa’ ngħata lura lin-nies pedonali, b’mod li issa, iżjed nies qed jiltaqgħu fil-pjazza u qed jużawha fuq livell soċjali.
Fil-Birhu, karatteristiċi storici, bħall-impronta tat-torri tal-arloġġ antik, ġew ippreżervati u ċċelebrati, u juru l-mod distint ta’ Studjurban li jħallat sensittività għall-wirt ma’ urbanizmu kontemporanju.
Dr Zammit spjega kif Studjurban jorbot ir-riċerka, id-disinn u policies biex jittieħdu deċiżjonijiet aħjar dwar l-element urban f’Malta.
Id-dokument ta’ linji gwida Resident First dwar il-mobilità sostenibbli, żviluppat b’kollaborazzjoni mal-Assoċjazzjoni tal-Kunsilli Lokali, joffri strateġiji favur il-kunċett ta’ last mile fit-trasport kif ukoll inizjattivi li jiffaċilitaw il-mixi, il-mobilità magħquda, l-immaniġġjar tal-parkeġġ u l-integrazzjoni tal-vetturi elettriċi.
“Dan ir-rikonoxximent importanti mhux biss jippremja l-impenn tat-tim favur disinn urban li huwa sensittiv ħafna għall-aspetti kulturali, iżda juri wkoll li qed tiber il-kuxjenza rigward il-fatt li l-ispazji pubbliċi għandhom jingħataw lura lin-nies u li d-disinn urban, meta jinħaseb sew, jista’ jbiddel il-ħajja ta’ kuljum filwaqt li jibqa’ jirrispetta l-imgħoddi u l-istorja ta’ Malta,” temm jgħid Dr Zammit.
