Box Office
Il-Ħamis tal-ġimgħa l-oħra, l-Amerikani ċċelebraw Thangsgiving. Apparti l-ikla tradizzjonali bejn il-membri tal-familja, l-Amerikani jħobbu jmorru jaraw film. Minn din it-tradizzjoni gawda mmens il-film animat “Moana 2”. Bejn il-Ħamis u l-Ħadd, dan il-film tad-Disney kellu dħul super-fonominali ta’ $221 miljun.
B’hekk kiser bil-kbir kull record, inkluż dak ta’ “Frozen II” li fl-2019, kellu dħul ta’ $125 miljun fuq l-istess ħamest ijiem. Anke fil-pajjiżi l-oħra fejn ħareġ għall-wiri, “Moana 2” qed jikseb suċċess u kellu dħul ta’ $165 miljun oħra.
Thanksgiving ta’ din is-sena ssarraf f’bonanza għas-sidien tat-teatri Amerikani. “Wicked” kompla sejjer tajjeb b’dħul ta’ $118-il oħra f’dawk il-ħamest ijiem. “Gladiator II” ukoll kompla jiġbed in-nies b’dħul ta’ $44 miljun. Sa issa d-dħul globali tal-film ta’ Ridley Scott hu ta’ $320 miljun mit-teatri biss. Il-Paramount diġa poġġew “Gladiator II” fuq video-on-demand u allura id-dħul hu akbar.
Fir-raba’ u fil-ħames post tal-box office Amerikana, wieħed isib żewġ films b’storja marbuta maż-żmien il-Milied: “Red One” u “The Best Christmas Pageant Ever”
Moana 2
Tmien snin ilu kien ħareġ “Moana” li kiseb suċċess akbar milli kien mistenni. Għalhekk kien naturali għall-kumpanija Disney li tkompli din l-istorja.
F’dan is-sequel, in-narrattiva teħodna tliet snin wara dik tal-ewwel film. Il-protagonista Moana hi t-tifla kurjuża taċ-chief Tui u martu Sina. Moana taslilha sejħa mingħand l-antennati tagħha. Hi tiġbor madwarha ekwipaġġ li jinkludi lil Maui. Flimkien jibdew vjaġġ lejn l-ibħra imbegħda sabiex itemmu darba għal dejjem is-saħta li alla Nalo kien għamel fuq il-gżira moħbija ta’ Motufetu.
Id-direzzjoni din id-darba hi f’idejn David G. Derrick Jr., mgħejjun minn Jason Hand u Dana Ledoux Miller.
Auli’i Cravalho terġa tislef il-vuċi tagħha għall-karattru ta’ Moana. Dwayne Johnson jirritorna biex jagħti ħajja lil Maui.
“Moana 2” hu kklassifikat PG minħabba xi xeni fejn ikun hemm theddid.
Red One
Dan il-Milied, Dwayne Johnson għandu missjoni delikata bħala l-bodyguard personali ta’ Santa Klaws. Callum Drift (Johnson), irid isib lill-boss tiegħu meta jinħataf ftit jiem qabel lejliet il-Milied.
Minħabba f’hekk, konfużjoni sħiħa tibda tirrenja fin-North Pole. Minħabba li din il-missjoni ma setax jagħmilha waħdu, Callum ma jkollux triq oħra ħlief li jirrikluta lil Jake O’Malley (Chris Evans). Dan ikun wieħed li jilgħab bla skrupli fuq l-isports, iddivorzjat imma hacker mill-kbar.
Il-karattri ta’ Callum u ta’ Jake ikunu opposti għal xulxin.
J.K. Simmons jidher fil-parti ta’ Santa Klaws, magħruf ukoll bħala Red One bl-operazzjoni tiegħu qisha waħda militari.
Maħdum taħt id-direzzjoni ta’ Jake Kasdan, “Red One” huwa film passabbli b’mumenti divertenti.
“Red One” hu kklassifikat 12A minħabba xeni ta’ vjolenza moderata.
Beatles ’64
Id-dokumentarju “Beatles ‘64” li bħala producer għandu lil Martin Scorsese, jurina il-laqgħa li kellu dan il-grupp fenominali meta żaru l-Istati Uniti għall-ewwel darba 60 sena ilu.
Maħum taħt id-direzzjoni ta’ David Tedeschi, il-mawra ta’ The Beatles damet tliet ġimgħat. F’New York ħadu sehem f’“The Ed Sullivan Show”. Wara qabbdu l-ferrovija u marru Washington, D.C., fejn taw kunċert f’Washington Coliseum. Il-mawra kompliet f’Miami Beach, fejn kellhom it-tieni dehra fil-programm popolari ta’ “Ed Sullivan”. Il-laqgħa kbira tal-ammiraturi tagħhom mhix nieqsa.
Dan id-dokumentarju jinkludi ħafna mill-footage li kien inġibed minn David u Albert Maysles. Dawn il-filmati kienu dehru fid-dokumentarju tal-1964, “What’s Happening! The Beatles in the U.S.A.”. Imma dan id-dokumentarju ġdid “Beatles ’64” jinkludi 17-il minuta li ma ntwerewx qabel. L-aħwa Maysles kienu segwew The Beatles waqt iż-żjara kollha u b’kollox ġibdu mal-11-il siegħa ta’ film fuq is-16mm, Dawn il-filmati issa ġew restawrati. Tant ġew restawrati tajjeb minn WingNut Studios ta’ Peter Jackson, li ċertu xeni ikoniċi jidhru qishom inġibdu riċenti.
L-erba’ membri tal-grupp The Beatles kienu mużiċisti eċċellenti imma kienu wkoll nies ferriħija. Dan jidher u jinħass f’dan id-dokumentarju.
