F’sentenza li ta, s-Servizz tat-Tribunal tat-Tobba Mediċi fl-Ingilterra waqqaf tabiba irtirata milli tipprattika wara li kkawżat danni kriminali u wettqet imġieba professjonali ħażina waqt protesti klimatiċi li ħadet sehem fihom. It-tabiba, Diana Warner, minn Filton, Bristol, ingħaqdet mal-grupp ta’ attivisti, Insulate Britain. Huma kellhom l-għan li jfixklu l-ħajja ta ‘kuljum fi sforz biex jiġbdu l-attenzjoni għat-tibdil fil-klima u jisfurzaw lill-gvern biex jieħu azzjoni.
Bejn Settembru u Ottubru 2021, Dr Warner u attivisti oħra kienu involuti fi protesti li kienu jinvolvu l-imblukkar tat-traffiku fuq l-M25 u t-toroq tal-madwar. Hija baqgħet “soda” fil-fehma tagħha li l-azzjonijiet illegali tagħha kienu ġġustifikati għall-fini tas-saħħa pubblika.
It-tabiba anzjana ta’ 65 sena ħadet sehem fi tliet protesti u ġiet darbtejn ikkundannata l-ħabs għall-involviment tagħha. Il-grupp għamel sensiela ta’ protesti kkoordinati madwar Londra u x-Xlokk tal-Ingilterra, li wasslu għal tfixkil kbir għas-sewwieqa u konfronti rrabjati.
Fit-trattazzjoni tal-każ tagħha, Dr Warner qalet lit-tribunal li t-tibdil fil-klima joħloq problema enormi u urġenti li teħtieġ azzjoni immedjata u awtorevoli.
Bħala tabiba, ħasset li kien id-dmir tagħha li taġixxi f’isem il-pazjenti tagħha u l-pubbliku nġenerali. Sostniet ukoll li dejjem aċċettat il-konsegwenzi tal-azzjonijiet tagħha u filwaqt li ammettiet li dak li għamlet kiser il-liġi nazzjonali qalet li kienet taf il-konsegwenzi potenzjali.
Għalkemm it-tribunal ma sab l-ebda tħassib fir-rigward tal-kapaċitajiet kliniċi ta’ Dr Warner, iddeċieda li d-deċiżjoni tagħha li taġixxi illegalment tista’ twassal biex xi pazjenti jiddubitaw il-ġudizzju tagħha bħala professjonist mediku.
It-Tribunal qal li huwa inaċċettabbli għat-tobba li jaġixxu b’mod ripetutament illegali u li jieħdu deċiżjonijiet deliberati konxji biex ipoġġu sezzjonijiet oħra tal-pubbliku f’riskju waqt il-protesti.
It-Tribunal qata wkoll li t-tobba, bħaċ-ċittadini kollha, għandhom id-dritt li jesprimu l-opinjonijiet personali tagħhom dwar kwistjonijiet, inkluż it-tibdil fil-klima. Madankollu, meta l-protesta tat-tobba tirriżulta fi ksur tal-liġi, għandhom jifhmu li huma l-azzjonijiet tagħhom, aktar milli l-motivazzjonijiet tagħhom, li se jkunu taħt skrutinju.