Għaxar atleti minn Dragon Academy Malta għadhom kif irritornaw lura minn Franza wara li ħadu sehem f’kompetizzjoni tat-Taekwondo f’Villeneuve Sur Lot, raħal li jinsab madwar 150 km mill-belt ta’ Toulouse, Franza. Għal dan il-kampjonat ‘open’ ħadu sehem madwar 250 atleti minn 37 clubs Franċiżi. L-avveniment kien organizzat minn Lovent Taekwondo Club Villeneuvois u Olympic Dojang Layrac, immexxija minn Fabien Causse u Amar Dif rispettivament.
It-team kien jikkonsisti mill-aħwa femminili, Shania, Kylie u Kendra Magro, Luke Chircop, Samuel Vella, Jerome Vassallo, Chloe Vassallo, Nathan Ellul, Aretina Chamaleli u Oleksandra Slobodian. Jikkumpanjaw lil dan il-grupp kien hemm ukoll Nathan Degiorgio li sfortunatament sofra injury ġimgħa qabel. Nieqsa mill-grupp kienet Nicole Bunce għal raġunijiet personali.
L-atleti kienu akkumpanjati minn numru ta’ ġenituri u membri oħra tal-istess akkademja. Il-coaches kienu Stephen Formosa u Mauro Busuttil.
Din kienet l-ewwel kompetizzjoni barra minn Malta mindu faqqgħet il-pandemija tal-Covid-19. Matul l-aħħar xhur, il-coach Busuttil ħadem qatiegħ sabiex jagħmel ċert li l-atleti jkunu fl-aħjar kundizzjoni fiżika u mentali.
Bla dubju ir-riżultat miksub kien bla preċedent fejn b’kollox intrebħu żewġ midalji tad- deheb, erbgħa tal-fidda u tnejn tal-bronż, li fisser li DAM iklassifikat fit-tielet post fost minn 37 clubs parteċipanti.
Il-protagonista tal-ġurnata kienet Aretina Chamaleli li rebħet żewġ midalji ta-deheb f’temp ta’ gimgħa wara li hi wkoll ikklassifikat fl-ewwel post fl-Invitational Games li saru f’pajjiżna, organizzati mill-Kumitat Olimpiku Malti u l-Assoċċjazzjoni Maltija tat-Taekwondo.
L-istess każ kien għaż-żewġ atleti żgħar Luke Chircop u Oleksandra Slobodian, li rebħu midalja tal-fidda u tal-bronz rispettivament.
Għal Nathan Ellul kienet l-ewwel kompetizzjoni tiegħu, kif għal Samuel Vella kienet l-ewwel esperjenza barra minn xtutna. Madankollu it-tnejn taw ħilithom kollha. Bħas-soltu l-aħwa Magro ħallew impressjoni tajba ħafna fejn Shania u Kylie rebhu midalja tal-fidda u ċ-ċkejkna Kendra rebħet midalja tad-deheb. Jerome Vassallo rebaħ midalja tal-bronż wara li gie megħlub fit-tieni logħba tiegħu.
