Minn Kayne Said, Maniġer għal Komunikazzjoni – Fondazzjoni Logħob Responsabbli – [email protected]
Il-Fondazzjoni Logħob Responsabbli kompliet twettaq il-missjoni tagħha biex tippromwovi kultura ta’ logħob sostenibbli u sikur f’Malta, permezz ta’ taħriġ speċjalizzat li ngħata lill-impjegati tal-Awtorità Maltija għall-Logħob (MGA), National Lottery kif ukoll lis-Sedqa u l-Appoġġ. Dan it-taħriġ sar fis-26 u 28 ta’ Marzu u kien immexxi minn Dr Maris Catania – figura rinomata u rispettata fil-qasam tal-logħob responsabbli u l-identifikazzjoni ta’ mġiba problematika marbuta mal-logħob tal-azzard.
Il-Fondazzjoni għandha rwol fundamentali fil-qafas soċjali ta’ Malta fejn jidħol il-logħob tal-azzard. Bħala organizzazzjoni li taħdem fuq prevenzjoni, edukazzjoni u sapport, il-Fondazzjoni taħdem biex tiżgura li l-logħob isir b’mod konxju, informat u fuq kollox responsabbli. It-taħriġ li toffri jservi biex jagħti l-għodod meħtieġa lill-professjonisti biex jidentifikaw każijiet ta’ riskju u jipprovdu s-sapport adegwat.
Il-parteċipazzjoni ta’ entitajiet ewlenin bħall-MGA, National Lottery, Sedqa u Appoġġ turi impenn serju favur il-ġlieda kontra l-problemi relatati mal-logħob tal-azzard eċċessiv. L-MGA, bħala l-awtorità regolatorja tal-industrija, għandha responsabilità diretta li tħares l-interessi kemm tal-operaturi kif ukoll tal-konsumaturi. Min-naħa l-oħra, Sedqa u Appoġġ jilagħbu rwoli vitali fil-qasam tas-saħħa mentali u l-appoġġ soċjali, speċjalment fejn jidħlu individwi li jesperjenzaw effetti negattivi mill-vizzju tal-logħob tal-azzard.
Wieħed mill-aspetti l-aktar pożittivi ta’ dan it-taħriġ huwa li jrawwem għarfien multidixxiplinarju u jsaħħaħ il-kollaborazzjoni bejn is-setturi regolatorji, terapewtiċi u soċjali. Il-parteċipanti setgħu jifhmu aħjar kemm huma kumplessi l-effetti tal-logħob problematiku – mhux biss fuq l-individwu, iżda fuq il-familji, il-post tax-xogħol u s-soċjetà inġenerali. B’dan il-mod, kull entità tkun aħjar ippreparata biex tirrispondi b’mod komprensiv, etiku u effettiv.
It-taħriġ fil-qasam tal-logħob responsabbli mhux biss isaħħaħ il-kompetenzi professjonali ta’ dawk involuti, imma huwa element kruċjali biex tinbena kultura ta’ prevenzjoni u sostenibbiltà fit-tul. Dan jippermetti wkoll li l-pubbliku jkollu aktar fiduċja fis-sistema, filwaqt li jgħin lill-industrija tal-logħob tal-azzard tibqa’ waħda reżiljenti u kredibbli.
Fl-aħħar nett, taħriġ bħal dan jikkonferma l-valur u l-viżjoni fit-tul tal-Fondazzjoni Logħob Responsabbli – viżjoni li tqiegħed is-saħħa mentali, il-ġid tal-komunità, u l-etika fuq quddiem nett.
Bħala pilastru tas-settur, il-Fondazzjoni qed tkompli turi li l-edukazzjoni u l-koperazzjoni huma l-aktar għodod effettivi biex jiġu indirizzati l-isfidi marbuta mal-logħob tal-azzard f’soċjetà moderna.
