Tarxien Rainbows ħabbru l-akkwist tal-attakkant Kolombjan Johan Alberto Castano għalll-istaġun li ġej.
Johan mhuwiex wiċċ ġdid għall-futbol Malti, wara li qatta’ l-aħħar 6–7 snin jilgħab ma’ diversi klabbs f’pajjiżna. Riċentement, lagħab ma’ Swieqi United, Fgura United, u Xagħra United. Matul iż-żmien tiegħu ma’ Xagħra, Johan wera l-ħila tiegħu fl-attakk billi skorja 12-il gowl fi 17-il partita, u wera x-xamma naturali tiegħu għall-gowl u l-abbiltà li jilgħab taħt pressjoni.
Attakkant b’saħħtu u intelliġenti, Johan jispikka biex isib spazju fl-attakk u jattakka l-ballun b’mod deċiżiv. Is-saħħa, il-moviment, u l-istint tiegħu li jiskorja jagħmluh żieda siewja għall-iskwadra hekk kif Tarxien Rainbows qed jippreparaw għall-isfidi tal-Malta Premier.