Il-Ġappun kisbu post fil-finali tat-Tazza tad-Dinja ta’ din is-sena fil-Qatar b’rebħa drammatika ta’ 2-0 kontra l-Awstralja li kkonfermat ukoll il-kwalifikazzjoni tal-Arabja Sawdija.
Żewġ goals tard mis-sostitut Kaoru Mitoma f’Sydney issiġillaw il-post tal-Ġappun fil-Qatar meta jonqos logħba oħra għal kull team.
Ir-rebħa tellgħet lill-Ġappun fil-quċċata ta’ Grupp B tal-kwalifikazzjoni Asjatika, fuq l-Arabja Sawdija li għandhom erba’ punti vantaġġ fuq l-Awstralja, li issa qed tiffaċċja play-off biex tilħaq il-ħames Tazza tad-Dinja konsekuttiva tagħha.
Is-Socceroos imisshom jiltaqgħu mal-Arabja Sawdija f’Jeddah nhar it-Tlieta f’dik li llum hija logħba mejta, qabel ma jkomplu jiffaċċjaw lill-pajjiż li jispiċċa t-tielet fi Grupp A f’logħba tal-play-off fis-7 ta’ Ġunju. Min jirbaħ minnhom jilgħab kontra l-ħames team tal-Amerika t’Isfel.
Il-Ġappun kellhom bżonn jegħlbu lill-Awstralja f’darhom għall-ewwel darba mill-1998 biex jikkwalifikaw, u deher li l-logħba kienet riesqa għal draw frustranti kontra t-team tas-Socceroos milqut mill-Covid-19 qabel ma Mitoma ħareġ minn fuq il-bank biex jiftaħ l-iskor fid-90 minuta.
Takumi Minamino kien laqat il-mimduda darbtejn fl-ewwel taqsima, u mbagħad kellu sforz fit-80 minuta minn sitt metri maqlugħ minn fuq il-linja minn Trent Sainsbury.
Il-winger Mitoma ħa post l-attakkant ta’ Liverpool fl-84 minuta u ftit wara qabeż fuq pass lura biex għeleb lill-goalkeeper Mat Ryan u qanqal ċelebrazzjoni eċċessiva mill-viżitaturi.
Mitoma mbagħad aċċerta r-riżultat u l-kwalifika bla dubju ħames minuti wara meta qabeż lid-difiża għajjiena Awstraljana u reġa’ għeleb lil Ryan.