Illum, it-team nazzjonali tan-nisa se jospita lil dak tal-Azerbaijan f’dik li hi l-aħħar partita ta’ kwalifikazzjoni tat-Tazza tad-Dinja 2023, f’darna.
Din se tkun l-ewwel logħba internazzjonali ta’ Malta minn April meta t-team immexxi minn Mark Gatt kellu wirja mill-aqwa kontra d- Danimarka f’logħba li kienet ukoll valida mill-Kampjonat Ewropew tan-Nisa 2022.
F’din l-edizzjoni s’issa l- Maltin kisbu erba’ punti li huwa rekord f’din il-kompetizzjoni.
Id-draw ta’ 2-2 kontra il-Bosnja Herzegovina u r-rebħa ta’ 2-1 fuq l-Azerbaijan barra minn darna kienu l-fulkru tal-partiti ta’ Malta f’dan il-grupp ta’ kwalifikazzjoni.
Iżda il-coach ta’ Malta Gatt jinsab konxju mill-isfidi li jistgħu joffru dawn iż-żewġ avversarji.
“Dawn huma żewġ logħbiet fejn nistgħu nilagħbu l-istil tagħna,” spjega l-coach Gatt.
“Ninsabu ffukati biex niksbu aktar punti hekk kif nemmnu li nistgħu anke nirreġistraw rebħa f’dan il-programm doppju.
“Irridu peró nuru rispett lill-avversarji tagħna iżda ninsab kunfidenti fil-kapaċità tat-team tiegħi li jipproduċi żewġ wirjiet b’saħħithom kemm kontra l-Azerbaijan kif ukoll kontra l-Montenegro,” qal il-coach Malti.
Mill-aħħar partita internazzjonali ta’ Malta, kien hemm diversi trasferimenti li nvolvew lill-players tat-team nazzjonali.
Filwaqt li l-captain Emma Lipman estendiet l-esperjenza tagħha ma’ Como Women, il-midfielder Rachel Cuschieri ngħaqdet ma’ Sampdoria minn ma’ Lazio fejn wettqet l-assist rebbieħ fl-ewwel logħba tas-Serie A ta’ tmiem il-ġimgħa li għaddiet fir-rebħa ta’ 2-1 kontra Sassuolo.
Player oħra li se tilgħab l-Italja hija Maya Lucia, li ssieħbet ma’ Genoa.
Barra minn hekk, Maria Farrugia ħalliet lil Sunderland Ladies biex ingħaqdet ma’ Durham Women li magħhom diġà lagħbet żewġ logħbiet fil-kampjonat filwaqt li Haley Bugeja marret tilgħab fl-Istati Uniti hekk kif issa hija parti minn Orlando Pride fin-National Women’s Soccer League.
Intant, hemm bidla żgħira fl-iskwadra hekk kif l-attakkanta ta’ Gillingham, Ylenia Carabott, ġiet sostitwita minn Raina Giusti ta’ Birkirkara.
Giusti skorjat wieħed mill-goals tal-Istripes biex aċċertaw l-ewwel rebħa Maltija f’logħba tal-UEFA Women’s Champions League wara li għelbu lil Glentoran tal-Irlanda ta’ Fuq bl-iskor ta’ 2-1.
Fil-proċess, Giusti saret l-aqwa skorer Malti ta’ kull żmien għall-club lokali f’din il-kompetizzjoni bi tliet goals f’14-il dehra.
Hija se tingħaqad ma’ players sħabha ta’ Birkirkara jiġifieri Janice Xuereb, Stephania Farrugia, Charlene Zammit, Ann-Marie Said u Alishia Sultana.
“Ovvjament, ħafna players ilhom ma jilagħbu minn Mejju qabel ma beda l- pre-season,” spjega Gatt.
“Il-players kollha issa bdew jilagħbu mal-clubs tagħhom u wħud minnhom, speċjalment dawk ibbażati barra minn xtutna, diġà lagħbu logħob kompetittiv ukoll.
L-aħħar żewġ PARTITI ta’ Mark Gatt
Dawn iż-żewġ logħbiet se jkunu l-aħħar ta’ Mark Gatt fit-tmun tat-team nazzjonali.
Gatt ilu parti mit-team ‘A’ mill-2007 meta ngħata l-ewwel irwol ta’ assistant coach taħt il-gwida ta’ Pierre Brincat, illum Direttur tal-Football tan-Nisa.
Wara 39 logħba bħala l-id il-leminija tal-coach Brincat, Gatt inħatar responsabbli mit-team fl-2015 u s’issa mexxa lit-team f’60 partita, b’rekord ta’ 33 riżultat pożittiv li fihom ġew skojrati 81 goals.
Huma spiċċaw ukoll ir-raba’ fi grupp ta’ kwalifikazzjoni tal-UEFA Women’s Euro 2022 b’sitt timijiet b’rekord ta’ 10 punti – tragward li wassalhom biex jirbħu l-Premju tat-Team tas-Sena tal-Għaqda Ġurnalisti Sport.
“L-avventura tiegħi fit-tmun tat-team nazzjonali tal-kbar se tiġi fi tmiemha b’dawn iż-żewġ logħbiet u qed nimmira biex nispiċċa fuq nota pożittiva,” irrimarka l-coach ta’ Malta.
Il-partita se tintlagħab fis-Centenary Stadium, fis-7.30 pm.
