Minn Cristian Muscat
Malta …………0
Danimarka …..2
F’partita mir-round ta’ kwalifikazzjoni tat-Tazza tad-Dinja 2023 tan-Nisa, Malta sfat megħluba mit-team qawwi tad-Danimarka bl-iskor ta’ 2-0 li laqtu wkoll darbtejn il-lasti.
Peró, kollox ma’ kollox il-wirja tal-Maltin kienet waħda nkoraġġanti li mmaturat mal-kors tal-logħba wara li sofreja żewġ goals wara biss disa’ minuti.
Il-Maltin kellhom nieqsa lil Haley Bugeja waqt li d-Daniżi kienu mingħajr il-captain u l-aqwa player tagħhom, Pernille Harder, li weġġgħet fil-jiem li għaddew ma’ Chelsea.
Id-Daniżi għamlu l-intenzjonijiet tagħhom ċari mal-ftuħ tal-partita u wara biss ħames minuti fetħu l-iskor meta minn through pass ta’ Emme Snerle, id-difiża Maltija naqset milli tikklejra u JANNI THOMSEN approfittat u tefgħet il-ballun fix-xibka.
Huma komplew fuq l-offensiva u fid-disa’ minuta rduppjaw meta OLIVIA MOLLER HOLDT approfittat minn clearance erratika tal-Maltin u permezz ta’ xutt mill-ewwel mid-distanza għelbet għal kollox lill-goalkeeper, Jodie Attard, li setgħet għamlet aħjar.
Fid-19-il minuta l-coach ta’ Malta, Mark Gatt, kien kostrett jaffettwa sostituzzjoni sfurzata meta weġġgħet Maria Farrugia biex minflokha daħlet tilgħab Emma Xuereb.
Id-Daniżi komplew jiddominaw u fil-31 minuta, Nicole Sciberras wettqet indeċiżjoni fid-difiża biex rebħet il-ballun Stine Larsen li b’eleganza qabżet lil Jodie Attard bit-tentattiv tagħha jistampa ma’ sieq il-wieqfa, bid-difiża Maltija tikklerja l-periklu.
Eżattament qabel tmiem l-ewwel taqsima, Kathrine Meller Kuhl kellha xutt fil-baxx mill-viċin li ġie salvat minn Attard.
Fil-ftuħ tat-tieni taqsima, id-Daniżi komplew bl-istess ritmu u fit-53 minuta xutt ta’ Kathrine Meller Kuhl mid-distanza stampa mal-wieqfa.
Il-kumplament tal-partita kien wieħed ferm kajman ikkaratterizzat minn ħafna logħob f’nofs il-ground.
Dan sat-93 minuta meta s-sostituta Daniża Sanna Troelsgaard ittantat xortiha permezz ta’ xutt minn barra l-kaxxa li kważi qarraq għal kollox bil-goalkeeper Attard li iżda salvat tajjeb f’żewġ tentattivi.
MALTA: 23-Jodie Attard, 3-Ann-Marie Said, 4-Emma Lipman, 5-Jessica-Lee Dimech, 6-Dorianne Theuma (9-Leah Alice Ayres 86), 8-Rachel Cuschieri, 13-Maria Farrugia (18-Emma Xuereb 19) (7-Ylenia Carabott 74), 14-Shona Zammit, 16-Charlene Zammit, 17-Brenda Borg, 20-Nicole Sciberras – Coach: Mark Gatt
DANIMARKA: 1-Kathrine Larsen, 3-Sline Pedersen, 5-Simone Boye Sorensen (18-Luna Norgaard Gevitz 61), 6-Olivia Moller Holdt (17-Rikke Madsen 61), 8-Emme Snerle (7-Sanna Troelsgaard 74), 11-Katrine Veje, 12-Stine Larsen (9-Caroline Moller 61) , 13-Sofie Junge Pedersen, 15-Kathrine Meller Kuhl, 19-Janni Thomsen, 23-Sofie Svava (2-Sara Gedsted Thrige Andersen 62) – Coach: Lars Sondergaard
REFEREE: Kristina Georgieva (Bulgarija)
ASS. REFEREES: Yordanka Korcheva, Dzhukliana Butrakova (Bulgarija)
RABA’ UFF: Teodora Stoeva (Bulgarija)
SKORERS: J. Thomsen 5, O. Moller Holdt 9 (D)
AMMONITI: J.Dimech, A.M. Said (M); L. Norgaard Gevitz (D)
