Il-piramidi ta’ Giża b’sigriet taħt l-art…
Il-piramidi ta’ Giża fl-Eġittu huma strutturi storiċi li dejjem ġibdu l-attenzjoni ta’ studjużi minn madwar id-dinja kollha u huma attrazzjoni turistika li taffaxxina lil kull min isib ruħu quddiemhom. Dawn l-istrutturi ġganteski huma mibnija minn ġebel ta’ bejn 2.5 u ħames tunellati l-waħda u sal-ġurnata tal-lum, minkejja l-avvanzi kollha li għamilna, għadu ħadd ma rnexxielu jibni bħalhom. Sa ftit tal-ġranet ilu dawn il-piramidi magħmula minn miljuni ta’ ġebel kbir, kienu meravilja fuq barra iżda issa, meravilja ikbar hija dak li xjenzati ħabbru riċentament – meravilja taħt l-art. Eżattament taħt il-piramidi ta’ Giża, permezz ta’ teknoloġija avvanzata, saret skoperta li jekk ippruvata se tbiddel l-Istorja tal-umanità kollha. Dan hekk kif riċerkaturi ħabbru li sabu strutturi fondi u belt kbira tathom, belt li skont huma nbniet minn ċivilizzazzjoni ferm avvanzata li kienet teżisti eluf ta’ snin ilu.
Belt taħt l-art… 10 darbiet ikbar mill-piramidi u tinżel 1,981 metri ‘l isfel
Dan l-istudju ġdid dwar il-piramidi ta’ Giża qajjem kjass sħiħ madwar id-dinja. Ma setax jonqos li l-midja soċjali wkoll ittella’ din l-informazzjoni u magħha eluf ta’ kummenti min-nies. Ir-riċerkaturi mill-Italja u mill-Iskozja f’nofs dan ix-xahar ħabbru li sabu “belt kbira ħafna taħt l-art” li tinżel fond ta’ kważi 2,000 metru taħt il-piramidi ta’ Giża u hija 10 darbiet ikbar mill-piramidi infushom.
Din is-sejba straordinarja saret permezz ta’ apparat teknoloġiku avvanzat li jikkonsisti minn radar tal-polz li joħloq immaġini b’riżoluzzjoni għolja fil-fond taħt l-art fejn fil-fatt instabu dawn l-istrutturi. Din it-teknika tintuża bl-istess mod li r-radar tas-sonar jintuża biex jiġi mmappjat il-fond tal-oċeani.
L-istudju, li ma ġiex rivedut minn esperti indipendenti, sab b’kollox tmien strutturi f’forma ta’ ċilindri vertikali li jinżlu aktar minn 640 metri taħt il-piramid kif ukoll dak li jaħsbu li huma żewġt ikmamar kbar oħra f’fond ta’ 1,219 metri konnessi mal-imsemmija ċilindri. Madwar l-istess ċilindri fl-immaġini tar-radar jidher li hemm xi ħaġa mdawwra magħhom.
