Is-seed numru tnejn, Daniil Medvedev, għadda għat-tielet round tal-French Open li qed isir f’Roland Garros, Pariġi, wara li għeleb lis-Serb, Laslo Djere.
Iċ-champion tal-US Open ta’ 26 sena kiseb rebħa ta’ rutina 6-3 6-4 6-3 fil-partita tal-ftuħ tal-Ħamis fuq il-Court Philippe Chatrier.
Issa r-Russu se jiffaċċja lis-seed 28, li huwa Serb ieħor, Miomir Kecmanovic, li rebaħ f’erba’ sets kontra Alexander Bublik tal-Kazakhstan, 4-6 7-5 6-2 6-1.
Medvedev, li f’April saritlu operazzjoni tal-ftuq, issa rebaħ iż-żewġ logħbiet tiegħu fi tliet sets wara li fl-ewwel round għeleb lill-Arġentin Facundo Bagnis, 6-2 6-2 6-2.
Medvedev, li qed jikkompeti taħt bandiera newtrali f’Pariġi, huwa wieħed mill-players li mhux se jitħallew jikkompetu f’Wimbledon din is-sena wara li players Russi u Belarussi ġew ipprojbiti wara l-invażjoni tar-Russja tal-Ukrajna.
Din id-deċiżjoni qajmet kontroversja kbira bil-maġġoranza tal- players ikunu fost dawk li ma qablux magħha.
Il-Bulgaru Grigor Dimitrov kiseb rebħa komda biex għadda għat-tielet round wkoll meta għeleb lin-numru tnejn tal-Kroazja, Borna Coric, 6-0 6-4 6-3, waqt li l-Britanniku Cameron Norrie warrab l-isfida tal-Awstraljan, Jason Kubler, meta għelbu bil-punteġġ ta’ 6-3 6-4 6-3.
Il-Belġjan, David Goffin, tilef l-ewwel set kontra l-Amerikan Frances Tiafoe, iżda mbagħad ġie f’tiegħu biex ħareġ rebbieħ 3-6 7-6 (7-1) 6-2 6-4.
Anke l-Kroat, Marin Cilic, kien fl-istess sitwazzjoni meta ltaqa’ kontra l-Ungeriż Marton Fucsovics tant li għelbu 4-6 6-4 6-2 6-3.
Konfront bejn żewġ players Skandinavi ra lil Casper Ruud tan-Norveġja jelimina lil Emil Ruusuvousi tal-Finlandja, 6-3 6-4 6-2, waqt li player Skandinav ieħor, Holger Rune tad-Danimarka għeleb lil Henri Laaskonen tal-Isvizzera, 6-2 6-3 6-3.
It-Taljani Lorenzo Sonego u Marco Cecchinato kellhom fortuni differenti għax waqt li Sonego għeleb lil Joao Sousa tal-Portugall 7-6 (7-4) 6-3 6-4, Cecchinato safa eliminat mill-Pollakk Herbert Hurkacz, 6-1 6-4 6-2.
Il-Franċiż Hugo Gaston elimina lil Pedro Cachin tal-Arġentina meta għelbu fi tliet sets, 6-4 6-2 6-4, bħal m’għamel Mackenzie McDonald tal-Istati Uniti kontra l-Ġeorġjan, Nikoloz Basilashvili, 6-3 6-1 6-4.
NISA
Fil-kategorija femminili kien hemm l-eliminazzjoni taċ-Ċeka, Karolina Pliskova li sfat megħluba mill-Franċiża, Leolia Jeanjean, bil- punteġġ faċli ta’ 6-2 6-2.
Anke r-Rumena, Simona Halep, ġiet eliminata meta ltaqgħet kontra ċ-Ċiniża, Quiwen Zheng, 2-6 6-2 6-1.
Iżda l-Pollakka, Iga Swiatek, li hija msemmija fost il-favoriti li tirbaħ it-titlu, kisbet rebħa komda meta għelbet lill-Amerikana Alison Riske, 6-0 6-2.
Amerikana oħra, Madison Keys, kompliet tavvanza meta għelbet lill-Franċiża Caroline Garcia 6-4 7-6 (7-3) waqt li l-kompatrijotta tagħha Jessica Pegula kompliet tavvanza wkoll meta għelbet lil Anhelina Kalinina tal-Ukrajna, 6-1 5-7 6-4.
Rebħa f’żewġ sets kisbitha Danka Kovinic tal-Montenegro meta għelbet lil Anna Karolina Schmiedlova tas-Slovakkja, 6-3 7-5, l-istess bħar-Russa, Daria Kasatkina, li għelbet lil Fernanda Contreras tal- Messiku, 6-0 6-3, Elena Rybakina tal-Kazakhstan lill-Amerikana Katie Volynets 6-4 6-0 u r-Russa Ayrna Sabalenka kontra l-Amerikana wkoll, Madison Brendle, 6-1 6-3.
L-Ispanjola Paula Badosa rkuprat mit-telf tat-tieni set kontra Kaja Juval tas-Slovenja meta għelbitha 7-5 3-6 6-2 bit-Taljana Camila Giorgi toħroġ minn fuq kontra Julia Putintseva tal-Kazakhstan, 6-1 5-7 6-4.
