Novak Djokovic jista’ jiddefendi t-titlu tiegħu ta’ Wimbledon wara li l-organizzaturi qalu li l-players li mhumiex imlaqqma kontra l-Covid-19 se jitħallew jikkompetu.
In-numru wieħed tad-dinja, is-Serb ta’ 34 sena, ma tħalliex jilgħab fl-Australian Open f’Jannar wara kwistjoni li kienet iċċentrata madwaru għax ma kienx imlaqqam.
“Ir-rekwiżit stabbilit mill-gvern biex wieħed jidħol fir-Renju Unit ma tinkludix tilqim obbligatorju,” qalet il-kap eżekuttiv tal-All England Lawn Tennis Club, Sally Bolton, f’konferenza tal-aħbarijiet.
“Għalhekk, filwaqt li ovvjament hija mħeġġa, mhix kundizzjoni tad- dħul.”
Wara s-saga ta’ profil għoli madwar l-Australian Open, li spiċċat billi ġie deportat minħabba l-istatus tiegħu tal-Covid, Djokovic imbagħad tilef tournaments oħra fosthom l-Indian Wells u Miami minħabba r-regoli tal-coronavirus għad-dħul fl-Istati Uniti.
Matul dak il-perjodu huwa tilef ukoll il-post numru wieħed tad-dinja kontra r-Russu, Daniil Medvedev, iżda minn dakinhar reġa’ kisbu lura meta ħa sehem f’tournaments b’ħafna pajjiżi jirrilassaw ir-rekwiżiti tad-dħul tagħhom rigward it-tilqim.
Fi tmiem il-ġimgħa Djokovic wasal sal-ewwel finali tiegħu tas-sena, meta tilef kontra r-Russu, Andrey Rublev, fis-Serbia Open f’Belgrad.
Djokovic, li rebaħ 20 titlu tal-Grand Slam, fi Frar qal li jippreferi jitlef trofej futuri tat-tennis milli jkun sfurzat jieħu vaċċin tal-Covid.
Wimbledon se jibda fis-27 ta’ Ġunju u jintemm fl-10 ta’ Lulju.
