Aktar minn 12,000 student li attendew SkolaSajf matul dawn l-aħħar ġimgħat kellhom l-opportunità jkabbru l-għarfien u l-kapaċità finanzjarja tagħhom permezz t’attivitajiet relatati mal-abilità finanzjarja, l-valur u l-għaqal, flimkien mal-użu prattiku tal-flus.
Dan sar b’kollaborazzjoni bejn il-Fondazzjoni għas-Servizzi Edukattivi fi ħdan il-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni u l-fergħa ĠEMMA li tagħmel parti mill-Ministeru għall-Politika Soċjali u d-Drittijiet tat-Tfal.
Is-sessjonijiet t’għarfien finanzjarju ngħataw lil studenti ta’ bejn is-7 u l-11-il sena, li wkoll ikkompetew fi gruppi, fl-iskejjel madwar Malta u Għawdex.
Dalgħodu ġiet rikonoxxuta l-ħidma tal-istudenti kif ukoll il-professjonisti li qasmu l-għarfien tagħhom matul dawn l-aħħar ġimgħat. Dan sar waqt ċerimonja tal-premjazzjoni fil-preżenza tal-Ministru għall-Politika Soċjali u d-Drittijiet tat-Tfal Michael Falzon u l-Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni Clifton Grima.
Il-Ministru Michael Falzon saħaq, “Jeħtieġ li noħolqu aktar sens ta’ maturità u valur soċjali fost is-soċjetà tagħna, u għandna nibdew nagħmlu dan minn etajiet żgħar. Huwa għalhekk li inizjattivi bħal dawn għandhom ikomplu jissaħħu fi skejjel sekondarji, ħalli verament l-adoloxxenti jkunu f’qagħda tajba li jiddeċiedu dwar l-għażliet finanzjarji tagħhom.”
Il-Ministru Clifton Grima tkellem dwar l-importanza li qed jingħata dan is-suġġett fl-iskejjel bħala tagħlim ta’ għodda edukattiva għall-istudenti biex jitgħallmu dwar aspetti finanzjarji differenti. “L-edukazzjoni finanzjarja hija aspett importanti tal-edukazzjoni taċ-ċittadinanza. Bħala Gvern, aħna kommessi biex ngħinu lill-istudenti tagħna ta’ kull età bl-aħjar mod li nistgħu u nipprovdulhom l-għodda meħtieġa biex ngħinuhom jiżviluppaw aktar il-ħiliet u l-kapaċitajiet tagħhom,” qal il-Ministru Grima. Huwa tkellem dwar is-sessjonijiet ta’ litteriżmu finanzjarju fl-iskejjel statali f’Malta u Għawdex biex jgħinu lill-istudenti jibnu ħiliet essenzjali fl-immaniġġjar tal-flus, kif ukoll waqt SkolaSajf li toffri lill-istudenti attivitajiet interessanti lil hinn mill-klassi, bis-sessjonijiet ta’ Ġemma jiffokaw fuq edukazzjoni finanzjarja prattika.
Waqt is-sessjonijiet ĠEMMA ta’ din is-sena dwar il-kapaċità finanzjarja it-tfal ġew mgħammra b’ħiliet essenzjali għall-ħajja b’mod prattiku u divertenti. Permezz ta’ attivitajiet adattati għall-età tagħhom, tgħallmu kemm huwa importanti li jagħmlu għażliet intelliġenti, jippjanaw bil-quddiem, jiffrankaw, u jużaw il-flus b’mod responsabbli.
Studenti ta’ bejn is-7 u t-8 snin ħolqu posters Keep Money Safe biex juru l-fehim tagħhom dwar il-bżonnijiet, ix-xewqat, l-iffrankar u l-qsim ma’ ħaddieħor, filwaqt li studenti ta’ bejn id-9 u l-11-il sena ddisinjaw Money Smart Board Games, li għaqqdu l-għarfien mal-kreattività u l-ħidma f’tim.
Dawn il-kompetizzjonijiet enfasizzaw kif it-tfal tgħallmu japplikaw ħiliet u tagħlim essenzjali dwar il-flus b’modi divertenti u immaġinattivi. Il-proġetti rebbieħa kienu distinti għall-oriġinalità tagħhom, iċ-ċarezza tal-messaġġ u l-ħidma f’tim, u wrew li l-edukazzjoni finanzjarja tista’ tkun pjaċevoli u ta’ valur għal kull età.