Wara li Windsor ippruvaw jaħbu l-lejl ta’ rikoveru fi sptar li kellha r-Reġina Eliżabetta II fi tmiem il-ġimgħa, il-midja rrapportaw tħassib u lmentaw minħabba n-nuqqas ta’ informazzjoni dwar il-problemi tas-saħħa tas-sovrana Ingliża. Ħafna qegħdin jispekulaw li hemm aktar affarijiet mistura dwar din il-familja prestiġġjuża u li mingħajr it-tmexxija ta’ Eliżabetta, il-familja rjali Ingliża tikrolla.
L-aħbar uffiċjali li r-Reġina Eliżabetta II qattgħet lejl fi sptar ħarġet 24 siegħa wara li l-midja kienet infurmata li r-reġina kienet qiegħda “tistrieħ fil-Kastell ta’ Windsor”. Ħafna lmentaw li għal darb’oħra ngħataw informazzjoni skorretta u li din qiegħda twassal biex is-sitwazzjoni tkun agħar.
Id-“Daily Best” staqsa x’jista’ jkun hemm aktar moħbi u jingħad li fost il-mistoqsijiet hemm dik jekk ir-Reġina Eliżabetta II hiex lesta li ċċedi t-tron u tirtira. Huwa fatt magħruf li l-familja rjali Ingliża hija b’saħħitha u popolari grazzi għal Eliżabetta li ilha aktar minn 70 sena fit-tmexxija. Ħafna jemmnu li ladarba tmut ir-reġina, is-saħħa u l-influwenza tal-familja rjali tispiċċa.
Minkejja l-mewt tar-raġel tagħha Philip u l-età avvanzata li għandha, ir-Reġina kompliet bl-impenji rjali tagħha. Hija dejjem baqgħet tonora r-responsabbiltajiet tagħha bħala kap tal-istat u hija xempju ta’ stabbiltà u kontinwazzjoni tal-monarkija Ingliża li tmur lura għad-disa’ seklu.
Bħala eredi tat-tron hemm jistenna l-Prinċep Karlu, l-eks raġel tal-mibkija Prinċipessa Diana, preżentement miżżewweġ lil Camilla Parker Bowles. Jingħad, però, li l-poplu Ingliż ma jridx li jkun Karlu li jsir re, iżda ibnu u iben Diana, il-Prinċep William. Sadanittant, sakemm ma minn Windsor ma jħabbarx mod ieħor, it-tmum se jibqa’ f’idejn Eliżabetta II.
