Illum jingħata bidu għall-Fażi tal-Kampjonat tal- UEFA Champions League li fiha jieħdu sehem 36 team.Kull wieħed minnhom irid jilgħab kontra tmien avversarji differenti, fuq bażi ta’ erbgħa home u erbgħa away.
L-ewwel tmien timijiet jikkwalifikaw b’mod awtomatiku għall-Aħħar 16. It- timijiet li jispiċċaw bejn id-disa’ u l-24 post jilagħbu fi play-off fuq żewġ legs biex ikunu magħrufa t-tmien timijiet l-oħra. It-timijiet li jispiċċaw mill-25 post ‘l isfel jiġu eliminati.
Iċ-champions renjanti, Paris St-Germain jibdew id-difiża f’darhom kontra Atalanta.
L-aħħar dehra tagħhom fuq il-palk internazzjonali kienet il-finali tas-Super Cup Ewropea meta għelbu lil Tottenham 4-3 bil-penalties wara draw ta’ 2-2.
Peró, il-Pariġini għadhom qed jiddominaw ix-xena domestika meta għandhom punti massimi minn erba’ partiti.
Min-naħa tagħhom, Atalanta jinżlu b’moral għoli hekk kif ġejjin minn rebħa ta’ 4-1 fuq Lecce.
Arsenal imorru jilagħbu għand Athletic Bilbao u jibdew favoriti li jiksbu t-tliet punti minħabba l-bidu qawwi fil-Premier League Ingliż li huwa meqjus bħala l-aħjar fid-dinja.
Huma ġejjin minn rebħa ta’ 3-0 fuq Nottingham Forest u jinsabu fit-tieni post tal-klassifika.
Juventus jilqgħu lil Borussia Dortmund. Il-Bianconeri jimmiraw li jkomplu jibnu fuq il-bidu pożittiv hekk kif qed jaqsmu l-ewwel post ta’ Serie A flimkien ma’ Napoli.
Huma ġejjin minn rebħa drammatika kontra r-rivali eterni Inter bl-iskor ta’ 4-3, bil-goal tar-rebħa jasal proprju fil-91 minuta.
Min-naħa tagħhom, Inter imorru jilagħbu l-Olanda biex jaffrontaw lil Ajax fejn jippruvaw jinsew dan id-diżappunt biex jinżlu lura b’rebħa.
Il-leaders ta’ La Liga, Real Madrid, għandhom jiksbu t-tliet punti meta jiltaqgħu kontra Marseille li jinsabu fis-seba’ post ta’ Ligue 1.
Partita mill-aktar interessanti tkun dik bejn Manchester City u ċ-champions Taljani, Napoli.
It-tnejn ġejjin minn rebħa. Filwaqt li n-Naplitani għelbu lil Fiorentina 3-1 barra minn darhom, is-City kisbu rebħa impressjonanti fuq Manchester United bl-iskor ta’ 3-0.
F’din il-partita ddebutta l-goalkeeper Taljan, Gianluigi Donnarumma, li f’waqtiet kien figura determinanti u għaldaqstant f’dan il-konfront l-attenzjoni se tkun fuqu.
Liverpool ikunu mpenjati f’partita diffiċli meta jilqgħu lil Atletico Madrid.
Minkejja li ċ-champions Ingliżi jinsabu fil-quċċata tal-Premier League, xejn ma huma qed jimpressjonaw, tant, li f’ċertu partiti daħkitilhom il-fortuna biex kisbu r-rebħa.
Nhar il-Ħadd li għadda, huma marru għand Burnley u għelbuhom bl-iskor ta’ 1-0 … proprju minn penalty fil-95 minuta.
