Il-pulizija sabu tarbija ta’ tliet xhur li kienet maħtufa minn appartament waqt li nannitha kienet qed toħroġ ix-xirja mill-karozza. Is-sejba tat-tarbija — Brandon Cuellar — saret ilbieraħ.
It-tarbija ttieħdet l-isptar għal xi testijiet bħala proċedura ta’ prekawzjoni.
Wieħed mill-pulizija minn dawk involuti f’din l-investigazzjoni, ilbieraħ ħabbar li qed tinżamm mara fil-kustodja tagħhom. Dan wara li dakinhar tal-inċident kienet maħtufa mill-istess raġel li wettaq ir-reat u meta nħelset mill-aggressur ma kinitx konsistenti fl-istqarrija li tat lill-pulizija.
Bħalissa hemm tliet persuni arrestati b’suspett ma’ dan il-każ u għadu mhux magħruf jekk din l-istess mara hix waħda minnhom.
Is-suspettat x’aktarx li huwa ta’ nazzjonalità Spanjola u kien liebes qalziet iswed, flokk blu skur, żarbun griż, kellu beritta griża fuq rasu u maskla sewda ma’ wiċċu.
Il-pulizija jinsabu għaddejjin bi tfittxija sabiex jinqabad ir-raġel li wettaq dan ir-reat it-Tnejn li għadda waranofsinhar, fi Triq San Jose, Kalifornja.
