Għaxar proġetti u inizjattivi ta’ għaqdiet mhux governattivi kisbu finanzjament li jvarja bejn tlett elef u għaxart elef ewro biex sa Novembru li ġej iwettqu proġetti u inizjattivi varji li jsaħħu l-ħidma kontra l-vjolenza abbażi tal-ġeneru u l-vjolenza domestika.
Il-proġetti magħżula fil-programm Together We Empower, imniedi mill-Kummissjoni dwar il-Vjolenza abbażi tal-Ġeneru u l-Vjolenza Domestika u mis-Segretarjat Parlamentari għall-Ugwaljanza u r-Riformi, ser jinvolvu mas-17-il għaqda peress li wħud mill-proġetti ser jitwettqu bi sħab bejn l-għaqdiet.
Waqt li tħabbru l-proġetti magħżula, is-Segretarju Parlamentari Rebecca Buttigieg qalet li dan il-programm ta’ finanzjament ta’ madwar mitt elf ewro, ser ikompli jsaħħaħ is-sinerġija bejn il-Kummissjoni u l-għaqdiet volontarji waqt li ser jagħti spinta lil kampanja kontinwa ta’ għarfien u impenn kontra l-vjolenza domestika.
Hija qalet li b’hekk qiegħda titwettaq miżura oħra tat-tielet strateġija nazzjonali kontra l-vjolenza domestika li t-titlu tagħha stess Ningħaqdu, Ninvolvu, Nelevaw jirrappreżenta l-kunċett ta’ dan il-programm ta’ koperazzjoni mal-għaqdiet volontarji.
Is-Segretarju Parlamentari qalet li b’dan il-mod kollaborattiv nistgħu flimkien nagħmlu d-differenza għal bidla kulturali biex inbiddlu l-isterjotipi u nxejnu r-relazzjonijiet abbużivi.
Il-Kummissarju dwar il-vjolenza abbażi tal-ġeneru u l-vjolenza domestika, Samantha Pace Gasan, qalet li l-proġetti u l-inizjattivi li ser jibbenefikaw minn dan il-programm ta’ finanzjament, ikopru firxa wiesgħa ta’ oqsma u realtajiet li jmissu mal-vjolenza domestika. Dawn jinvolvu taħriġ għat-tfal, iż-żgħażagħ u l-anzjani, riċerka dwar id-diskors ta’ mibegħda u prostituzzjoni, proġetti mmirati direttament għal persuni li huma fil-mira ta’ vjolenza abbażi tal-ġeneru kif ukoll inizjattivi speċifiċi mal-vittmi tal-vjolenza domestika.
Hija qalet li bit-twettiq ta’ dawn l-għaxar proġetti, il-Kummissjoni ser tkun qed taħdem fil-qrib mal-għaqdiet involuti biex tferrex aktar l-għarfien dwar bosta aspetti li jistgħu jwasslu għal vjolenza domestika u kif l-aħjar ikunu trattati diversi sitwazzjonijiet bħal dawn.
Il-proġetti magħżula huma:
- Stop the Violence Leader Training: Empowering Girls to Speak Up – Malta Girl Guides
- TAMA – TAMA
- Safe Spaces, Strong Voices: Art for Empowerment – LGBTI+ Gozo fi sħab mal-artisti Abi MacLeod u Alda Bugeja
- Be the Voice of Change: Shaping Positive Masculinity and Becoming an Active Bystander – Malta Women’s Lobby fi sħab ma’ Men Against Violence u Aġenzija Żgħażagħ
- Where Silence Holds – Dar Merħba Bik fi sħab ma’ Sejjaħli b’Ismi u l-kuratur Elyse Tonna
- Prostitution and Violence: Unpacking the Demand – Friends of Thouret Dar Hosea fi sħab ma’ Men Against Violence
- Care-Community Action to Reduce Elderly Abuse – SOS Malta fi sħab mal-Victim Support Malta
- Breaking the Cycle: Empowering Change for Perpetrators of Domestic and Gender-Based Violence – YMCA Malta
- Flimkien Kontra l-Vjolenza – Fondazzjoni Sagħtar
- AURORA – Awakening Understanding, Reclaiming our Resilience and Autonomy – St Jeanne Antide Foundation
Għal aktar dettallji dwar il-programm Together we Empower u l-għaxar proġetti tista’ żżur dan is-sit: https://www.stopviolence.gov.mt/ngo-funds/
