Il-Ministru għal Għawdex u l-Ippjanar, Clint Camilleri, nieda l-ħdax il-edizzjoni tal-Gozo Ceramics Festival. Dan il-festival, li issa sar sinonimu mal-bajja tax-Xlendi, ser jittella’ nhar is-Sibt 3 ta’ Awwissu.
Id-dettalji dwar il-Festival tħabbru waqt l-inawgurazzjoni ta’ wirja taċ-ċeramika li hi abbinata ma’ dan il-festival u li qed tittella’ fiċ-Ċentru Kulturali taċ-Ċittadella. F’din il-wirja, hemm esibiti xogħlijiet minn 30 ċeramista.
Il-Ministru Camilleri spjega li dan il-festival qed isir b’kollaborazzjoni bejn id-Direttorat tal-Wirt Kulturali fi ħdan il-Ministeru u l-Kunsill Lokali tal-Munxar. Waqt dan il-festival, xejn inqas minn 40 ċeramist, kemm lokali kif ukoll internazzjonali ser ikunu qed jaħdmu u jesponi x-xogħlijiet tagħhom fejn għal din is-sena ser tingħata aktar importanza l-aspett ta’ integrazzjoni soċjali hekk kif xi parteċipanti huma persuni b’diżabilità. Apparti dan, ser ikun hemm ukoll spazju ‘hands on’ biex it-tfal ikunu mħeġġa jaħdmu ċ-ċeramika.
“Jikkumplimenta dan kollu ser ikun hemm ukoll il-fjakkolata tax-Xlendi, mużika live minn bands lokali kif ukoll attrazzjonijiet oħra marbuta ma’ dan il-festival, li sena wara l-oħra qed ikompli jikber u jattira lejh aktar udjenza,” tenna l-Ministru.
Il-Ministru Camilleri rringrazzja b’mod partikolari lill-organizzaturi ta’ dan il-festival li ta’ kull sena jkomplu juri impenn u determinazzjoni li jkabbru dan il-festival u li sar attrazzjoni matul is-sajf.
Għal Gozo Ceramics Festival ser ikun hemm ukoll servizz ta’ Park & Ride.
Il-wirja taċ-ċeramika fiċ-Ċittadella tibqa’ miftuħa sa nhar it-Tlieta, 27 ta’ Awwissu 2024.
