‘Feeding Communities: Beyond education, being human’ hija inizjattiva li tnediet is-Sibt filgħodu fil-Palazz tal-Verdala. Sitt itfal minn istituzzjonijiet differenti madwar il-pajjiż ingħaqdu flimkien ma’ erba’ kokijiet biex iħejju pasti tal-Milied.
Din kienet l-ewwel sessjoni u waħda speċjali għal dawn iż-żminijiet ta’ festi qabel ma jingħata bidu għal kors ta’ sitt sessjonijiet konsekuttivi b’inizjattiva tal-Uffiċċju tal-President ta’ Malta flimkien ma’ Thomas Franks Ltd.
B’kollox tħejjew tletin pasta bit-tema tal-Milied, erbgħa minn kull tifel u tifla li għandhom bejn tnax u ħmistax-il sena.
F’kelmtejn waqt li żar din l-attività flimkien mas-Sinjura Vella, il-President George Vella esprima sodisfazzjon għal din l-inizjattiva maħsuba mhux biss biex tiżviluppa l-ħiliet tat-tfal fit-tisjir iżda wkoll biex tgħallimhom juru rispett lejhom infushom u jaħsbu aktar fil-komunità ta’ madwarhom.
Il-President u s-Sinjura Vella waqt li segwew il-proċess sħiħ tat-tisjir u t-tiżjin ta’ dawn il-pasti, irringrazzjaw lil Thomas Franks Ltd tal-koperazzjoni tagħhom u awguraw li l-proġett jitkompla b’suċċess fis-sena li ġejja.
