“Ixtri Proprjetà Sostenibbli” hi skema ġdida li permezz tagħha dawk li se jixtru proprjetà li hi konformi mal-istandards ta’ sostenibbiltà, se jkunu qed jirċievu għotja ta’ bejn €4,500 u €9,000 maqsuma fuq it-tliet snin li ġejjin.
Dan tħabbar f’konferenza tal-aħbarijiet, fl-uffiċini tal-Awtorità tal-Bini u l-Kostruzzjoni, mill-Ministru għall-Ġustizzja u r-Riforma fis-Settur tal-Kostruzzjoni, Dr Jonathan Attard, u l-Kap Eżekuttiv tal-Awtorità tal-Bini u l-Kostruzzjoni, il-Perit Roderick Bonnici, hekk kif se tkun l-istess Awtorità li se tmexxi din l-iskema.
“F’konformità mal-Viżjoni Malta 2050, din l-iskema tifforma parti minn sensiela ta’ inizjattivi li l-Gvern qed jimplimenta biex aktar persuni f’pajjiżna jkunu jistgħu jsiru sidien ta’ darhom — b’mod li jkun sostenibbli u favur l-ambjent. Din l-iskema hija miftuħa għal kulħadd, inkluż dawk li huma first-time kif ukoll second-time buyers, b’din l-aħħar skema tinċentiva l-akkwist ta’ binjiet sostenibbli”, qal il-Ministru Attard.
Dawn filwaqt li spjega kif meta wieħed jikkalkula l-għajnuniet kollha flimkien, dawn il-persuni jistgħu jkunu eleġibbli għal sa kważi €30,000 f’għajnuna diretta, li jinkludi: l-għotja ta’ €10,000 lil min qed jixtri l-ewwel proprjetà tiegħu, l-eżenzjoni mit-taxxa tal-boll fuq l-ewwel €200,000 tal-valur tal-proprjetà, u l-għajnuna finanzjarja l-ġdida taħt din l-iskema, li tvarja skont il-livell ta’ effiċjenza fl-enerġija tal-proprjetà.
Il-Ministru Attard żied jgħid li din l-iskema għandha l-għan li tkabbar id-domanda għal-proprjetajiet effiċjenti fl-użu tal-enerġija, u allura, se tkun qed tgħin ukoll sabiex l-istokk tal-bini li se jinbena fis-snin li ġejjin ikun wieħed sostennibli. Permezz ta’ dan, il-Ministru Attard spjega, li pajjiżna jkun jistà jkompli fit-triq li qabad sabiex jilħaq il-miri Ewropej stabbiliti għal-bini effiċjenti fl-użu tal-enerġija.
F’din il-konferenza intqal kif dawk li xtraw proprjetà sostenibbli mill-1 ta’ Jannar ta din is-sena l quddiem se jkun jistgħu jikkwalifikaw għal din l-iskema li se tinfetaħ nhar it-Tnejn 19 ta’ Mejju, 2025. Il-propjetà trid tinxtara sal-aħħar ta’ Settembru 2025, meta tagħlaq l-iskema.
Is-Sidien il-ġodda ta’ Proprjetajiet li huma klassifikati bħala Net Zero, jew ahjar dawk il-propjetajiet li jiġġeneraw iżjed enerġija milli għandhom bżonn bħala konsum, se jkun qed jirċievu l-ammont ta’ €3,000 fis-sena, fuq tliet snin, għat-total ta’ €9,000. Filwaqt li dawk li l-proprjetà tagħhom hi waħda li hi 20% aħjar minn dak rikjest mill-istandards Ewropej, li għandhom x’jaqsmu mal-enerġija, se jkunu qed jirċievu l-għotja ta’ €1,500 fis-sena, għal tliet snin, b’total ta’ €4,500.
Min-naħa tiegħu l-Kap Eżekuttiv tal-Awtorità tal-Bini u l-Kostruzzjoni, il-Perit Roderick Bonnici, spjega li ma’ kull applikazzjoni jrid jiġi sottomess il-kuntratt finali tax-xiri tal-proprjetà u l-Energy Performance Certificate tal-binja hekk kif mibnija, u allura mhux dak ibażżat fuq id-disinn tal-binja. Qal kif jistà jkun hemm biss applikazzjoni waħda għal kull binja, u applikazzjoni waħda għal kull persuna.
“Fl-aħħar snin l-Awtorità tal-Bini u l-Kostruzzjoni kienet katallista sabiex l-istokk tal-bini eżistenti u dak li inbena jkun wieħed sostennibli u li jilħaq l-istandards Ewropej. Filfatt l-Awtorità għandha sezzjoni li tiżgura li dan il-bini jkun f’konformi mall-istess standards. Permezz ta’ din l-iskema se mmorru pass oltre u ċioè li ngħinu lil dawk li se jixtru proprjetà jagħżlu waħda li tkun sostennibli u allura tuża anqas enerġija meta tkun abitabbli”, temm jgħid il-Perit Roderick Bonnici.
Intant, l-iskema se tkun qed tiftaħ għall-pubbliku minn nhar it-Tnejn li ġej, 19 ta’ Mejju. L-Applikazzjonijiet se jkunu qed jintlaqgħu b’mod elettroniku minn fuq is-sit bca.gov.mt. Minkejja li l-iskema se tibqa’ miftuħa sat-30 ta’ Settembru li ġej, l-Awtorità tista’ tagħlaq l-istess skema qabel jekk kemm il-darba l-fondi allokati jkunu ġew eżawriti. Għal iżjed informazzjoni wieħed jista’ jċempel fuq il-linja 138.
