Il-Ministeru għal Għawdex organizza t-tmien edizzjoni tal-Gozo Sports Awards fejn sportivi Għawdxin ġew ippremjati għall-avvanzi tagħhom f’diversi dixxiplini sportivi.
Waqt id-diskors tiegħu, il-Ministru għal Għawdex Clint Camilleri stqarr li din kienet sena oħra mimlija attività sportiva li matulha l-atleti Għawdxin stinkaw mhux biss sabiex ikunu fost l-aqwa lokalment iżda wkoll urew il-potenzjal tagħhom barra minn xtutna. Hawn rringrazzja lill-atleti Għawdxin li għamluna kburin fil-Logħob tal-Gżejjer li saru f’Guernsey ftit tal-ġimgħat ilu. Il-Ministru Camilleri qal li l-legat ta’ dan il-Logħob se jkun wieħed prezzjuż għax jemmen li aktar u aktar żgħażagħ qed jimpenjaw ruħhom bis-sħiħ sabiex jimmiraw li darb’oħra jkunu huma li jipparteċipaw b’suċċess. “Bħala Ministeru għal Għawdex żgur li se nkunu qed insostnu l-impenn tagħna sabiex inkomplu dak li bdejna u nkomplu nimirħu inkluż f’dixxiplini sportivi ġodda”, qal il-Ministru Camilleri.
Min-naħa tagħha, id-Direttur għas-Servizzi għal Għawdex fi ħdan il-Ministeru għal Għawdex Joyce Farrugia tkellmet dwar l-esperjenza tal-kontinġent Għawdxi fl-ewwel parteċipazzjoni fil-Logħob tal-Gżejjer li saru f’Guernsey.
Bħalma sar fl-edizzjoni preċedenti, din is-sena wkoll, ir-rebbieħa f’kull kategorija ntgħażlu minn membri tal-ġurija magħrufa fil-qasam sportiv Għawdxi u tħabbru fis-serata finali tal-bieraħ.
Dawn huma r-riżultati tal-Gozo Sports Awards 2023:
1. Uffiċjal tas-Sena: Noel Mizzi
2. It-Tim tas-Sena: Athletix AC Gozo
3. Kowċ tas-Sena: Felicienne Mercieca
4. Rikonoxximent għal Atleta ‘l fuq minn 45 Sena: Frank Xuereb
5. Rikonoxximent għal Karriera Sportiva: Jason Vassallo
6. Rikonoxximent Speċjali Special Olympics: Giuseppina Galea, Carmelo Pace
7. Żagħżugħa Promettenti: Keira Attard
8. Żagħżugħ Promettenti: Luigi Dimech
9. Sportiv tas-Sena: Marlon Attard
10. Sportiva tas-Sena: Estelle Scicluna
11. Rikonoxximenti lill-atleti li rebħu l-midalji fil-Logħob tal-Gżejjer li saru f’Guernsey – Marlon Attard, David Borg u Lara Calleja.
12. Rikonoxximent lill-atleta Għawdxi li rebaħ midalja fil-Logħob tal-Pajjiżi ż-Żgħar li saru Malta – Marcello Attard
Il-Gozo Sports Awards sar avveniment annwali li qed jikber minn sena għall-oħra u ta’ kull sena jiġbed parteċipazzjoni kbira minn assoċjazzjonijiet, klabbs u sportivi Għawdxin.
