Matul il-lejl li għadda twaħħlet b’suċċess waħda mill-aħħar strutturi li jiffurmaw l-flyover ġewwa l-Imsida Creek, f’inqas minn għaxar xhur minn mindu beda dan il-proġett. Dan it-tragward jimmarka pass ieħor importanti ’il quddiem f’wieħed mill-akbar proġetti infrastrutturali li għaddejjin fil-pajjiż bħalissa.
B’piż ta’ ’l fuq minn 45 tunnellata u b’tul ta’ aktar minn 25 metru, ix-xogħol li sar ftit tas-sigħat ilu kien jeħtieġ koordinazzjoni loġistika estensiva bejn diversi entitajiet u kumpaniji bl-għan li jitnaqqas kemm jista’ jkun l-inkonvenjent għal dawk li jiffrekwentaw din iż-żona.
Il-Ministru għat-Trasport, l-Infrastruttura u x-Xogħlijiet Pubbliċi Chris Bonett spjega li l-proġett tal-Imsida Creek miexi b’ritmu mgħaġġel u effiċjenti, tant li l-flyover il-ġdida mistennija tinfetaħ għat-traffiku sal-aħħar ta’ din is-sena, kif skedat. Huwa tenna li dan il-proġett jirrappreżenta mhux biss titjib sostanzjali fil-konnettività, iżda ser joffri spazji pubbliċi ġodda fil-qalba ta’ din il-lokalità filwaqt li jindirizza l-problema tal-għargħar. “Qed naraw proġett infrastrutturali fuq skala nazzjonali li qed jiġi implimentat minn kumpaniji Maltin, li mhux biss qed iwettqu xogħol ta’ kwalità għolja, imma wkoll qed juru b’mod ċar it-talent, id-dedikazzjoni u l-kapaċitajiet teknoloġiċi li għandna f’pajjiżna,” qal il-Ministru Bonett. Huwa rringrazzja lill-pubbliku, b’mod partikolari lir-residenti tal-Imsida, għall-koperazzjoni kontinwa li qegħdin juru biex dan il-proġett jitlesta u jibda jitgawda minn kulħadd.
Steve Ellul, Kap Eżekuttiv ta’ Infrastructure Malta qal li apparti x-xogħol fuq il-flyover li issa dieħel fl-aħħar fażi tiegħu, għaddej xogħol estensiv fuq żoni oħra ta’ dan il-proġett. “Ser inkomplu għaddejjin b’dan ir-ritmu biex nagħtu dan il-proġett lin-nies kemm jista’ jkun malajr,” temm jgħid Steve Ellul.
Għall-fażi li jmiss, Triq Mikiel Anton Vassalli (il-karreġġjata fid-direzzjoni lejn Birkirkara) se tkun magħluqa temporanjament nhar it-Tnejn 1 ta’ Settembru mill-8:00 ta’ filgħaxija sas-5:00 ta’ filgħodu. Dan l-għeluq temporanju hu neċessarju biex jitwassal b’mod sigur it-travu li jmiss fuq is-sit tax-xogħol. Is-sewwieqa huma mħeġġa jużaw rotot alternattivi filwaqt li jsegwu d-direzzjoni tal-uffiċjali ta’ Transport Malta li se jkunu fuq il-post biex jiggarantixxu s-sigurtà u l-immaniġġjar tat-traffiku.