Stephania Hincapie Rodriguez ta’ 27 sena, Maira Michel Tinoco Alzate ta’ 26 sena u Deniss Nicolle Tinoco Alzate ta’ 22 sena ammettew li użaw darhom bħala burdell. It-tliet nisa Kolumbjani jgħixu fl-istess residenza f’San Pawl il-Baħar.
Il-Prosekuzzjoni qalet li xi ġirien mill-istess blokka għamlu rapport fejn qalu li bdew jaraw diversi rġiel deħlin fl-appartament li jgħixu fih it-tfajliet. Il-pulizija għamlu l-investigazzjonijiet meħtieġa u nstab li r-rapport kien minnu. Il-pulizija talbu mandat sabiex jidħlu fl-appartament tat-tfajliet u hemm sabu oġġetti li huma relatati ma’ xogħol ta’ prostituzzjoni.
Il-Prosekuzzjoni qalet ukoll li t-tfajliet ġew jgħixu hawn Malta biex jaħdmu iżda mbagħad spiċċaw jagħmlu xogħol fil-prostituzzjoni. Intqal ukoll li huma kkoperaw mal-pulizija u li lesti jitilqu minn Malta immedjatament.
Huma nstabu ħatja fuq ammissjoni mill-Qorti li kienet ippreseduta mill-Maġistrat tal-Għassa Noel Bartolo, fejn ikkundannahom 18-il xahar ħabs kull wieħed sospiżi għal erba’ snin. Apparti dan, il-Qorti ordnat li jiġu kkonfiskati l-oġġetti li kienu esebiti. Għat-tfajliet dehret l-Avukat Leontine Calleja.
