Fl-aħħar ħinijiet mietet l-istilla ta’ Hollywood l-attriċi Stella Stevens li ħadmet partijiet ma’ Elvis Presley fil-films Girls! Girls! Girls! u flimkien ma’ Jerry Lewis fil-film The Nutty Professor.
Hija mietet fl-età ta’ 84 sena wara li għal dawn l-aħħar xhur kienet rikoverata l-isptar fl-Istati Uniti.
Hi tibqa’ mfakkra wkoll għall-irwol tagħhom fil-film The Poseidon Adventure kif ukoll għas-sehem li tat fis-serji Murder She Wrote u Magnum.
Maria Calabrese l-maniġer tagħha u anke ħabiba tal-qalb tal-attriċi f’kummenti li tat lill-midja internazzjonali qalet li “kien ta unur u privileġġ li naħdem ma’ Stella li kienet waħda mill-isbaħ mara u b’ħafna talenti.”
Stella twieldet f’Mississippi fl-1938 u kienet ingħatat l-isem ta’ Estelle Caro Eggleston. Ta’ 16-il sena kienet iżżewġet lil Noble Herman Stevens u kellhom tifel wieħed biss li tawh l-isem ta’ Andrew.
Sentejn wara hi ddevorzjat lill-żewġha u bdiet timmudella u anke bdiet tingħata partijiet minn films.
Hi rebħet il-Golden Globe fl-1959 għal film li kienet ħadmet Say One for Me.
