Raġel u mara ġew arrestati matul il-lejl wara li fil-pussess tagħhom instabu diversi sustanzi suspettati droga, b’valur fis-suq li jlaħħaq madwar is-€650,000.
Iż-żewġ persuni, raġel mill-Montenegro ta’ 27 sena u Serbjana ta’ 27 sena wkoll, kienu f’Volkswagen misjuqa mir-raġel. Huma twaqqfu ftit wara li waslu Malta bil-katamaran minn Sqallija fuq suspett ta’ traffikar u importazzjoni tad-droga mill-Italja.
Il-karozza ttieħdet fil-garaxx tal-Pulizija u minn tfittxijiet li saru, f’kompartamenti foloz li kien hemm fil-qiegħ u fuq wara tal-vettura, instabu diversi pakketti bid-droga. B’kollox instabu madwar 15-il kilo ta’ sustanza suspettata ħaxixa tal-kannabis, 3 kili ta’ sustanza suspettata kokaina kif ukoll mijiet ta’ pilloli roża suspettati ecstasy.
Membri mid-Dipartiment tad-Dwana assistew lill-Pulizija waqt din l-operazzjoni.
Bis-sejba kien infurmat il-Maġistrat Dr Joe Mifsud LL.D li ħatar inkjesta, filwaqt li ż-żewġ persuni qegħdin jinżammu arrestati fil-lock-up tal-Pulizija, il-Floriana.
L-investigazzjonijiet tal-Pulizija għadhom għaddejjin.