Tottenham Hotspur ħejjew pjanijiet biex jidħlu f’taqtiegħa ma’ Manchester United għall-firma tal-midfielder ta’ Lazio, Sergej Milinkovic-Savic, dan is-sajf.
Is-Serb ilu għal żmien twil marbut ma’ ċaqliq lejn uħud mill-akbar clubs tal-Ewropa, iżda qatt ma mmaterjalizza trasferiment matul is-snin.
Madankollu, dan jista’ jinbidel qabel l-istaġun li ġej hekk kif il-manager Taljan ta’ Spurs Antonio Conte, u d-Direttur Sportiv Fabio Paratici, qed jimmiraw għal offerta għall-player ta’ 27 sena.
Kwalunkwe mossa potenzjali tkun qed tara lill-club mit-Tramuntana ta’ Londra jikkompeti mar-Red Devils, li jingħad ukoll li huma interessati fil-player ta’ Lazio hekk kif qed ifittxu li jsaħħu l-għażliet ċentrali tagħhom f’nofs il-ground.
Il-kuntratt ta’ Milinkovic-Savic jiskadi fis-sajf tal-2024, u b’Lazio jistmawh għal madwar £65 miljun, jistgħu jfittxu li jħallsu flus qabel jonqos il-valur tiegħu.
Spurs iżda jkollhom bżonn jikkwalifikaw għaċ-Champions League tal-istaġun li ġej biex iżommu kwalunkwe tama li jiksbu l-mira tagħhom, li jistgħu tabilħaqq jilħqu hekk kif jinsabu fir-raba’ post fil-klassifika tal-Premier League.
Intant, Manchester United jinsabu fis-seba’ post, sitt punti wara Spurs, qabel il-partita tagħhom ma’ Norwich City f’Old Trafford illum is-Sibt.