Tottenham iffirmaw lid-difensur ta’ Middlesbrough Djed Spence fi ftehim li jista’ jitla’ għal £20 miljun.
Spence ffirma kuntratt ta’ ħames snin wara li mpressjona waqt perijodu ta’ self mat-team taċ-Championship, Nottingham Forest, fl-istaġun li għadda. Il-prezz inizjali ta’ dan il-player ta’ 21 sena huwa maħsub li hu ta’ £12.5 miljun iżda dan jista’ jitla’ għal £20 miljun f’bonuses u żidiet oħra.
Spence kien strumentali biex Forest rebħu l-promozzjoni għall-Premier League permezz tal-play-offs. Huwa għamel 46 dehra, fejn skorja tliet goals fejn laħaq il-qofol tiegħu b’rebħa fuq Huddersfield fil-finali tal-play-off f’Wembley.
Bl-inklużjoni ta’ Spence, issa l-coach ta’ Tottenham, Antonio Conte, iffirma sitt players li jinkludu lil Ivan Perisic, Fraser Forster, Yves Bissouma, Richarlison u Clement Lenglet.
