Il-Prim Ministru tal-Italja Giorgia Meloni ltaqgħet mal-President elett tal-Istati Uniti Donald Trump. Il-laqgħa saret fi Florida, proprju ftit tal-jiem qabel Trump jinħatar mill-ġdid bħala President tal-Istati Uniti.
Din iż-żjara ta’ Meloni saret ukoll ftit jiem qabel ma tiltaqa’ mal-President attwali Amerikan Joe Biden f’Ruma f’dak li mistenni li jkun l-aħħar vjaġġ tiegħu tal-presidenza barra l-pajjiż.
Għalkemm ma tħabbret l-ebda aġenda uffiċjali, in-New York Times irrapportat li Meloni għafset ħafna fuq il-każ ta’ Cecilia Sala, il-ġurnalista Taljana li tinsab miżmuma f’iżolament fl-Iran. L-Italja qiegħda tagħmel pressjoni kbira għall-ħelsien immedjat ta’ Sala mill-ħabs Evin f’Tehran.
Ġie rrapportat ukoll li temi oħra li ġew diskussi kienu l-gwerra fl-Ukrajna, il-provvisti tal-gass u l-possibilità ta’ tariffi ġodda tal-Istati Uniti fuq prodotti tal-Unjoni Ewropea.
Din kienet it-tieni darba li Meloni ltaqgħet ma’ Trump minn meta rebaħ l-elezzjoni presidenzjali tal-Istati Uniti f’Novembru.
