Il-President elett Amerikan Donald Trump, li waqt il-kampanja elettorali tiegħu spiss kien jgħid li jtemm il-gwerra fl-Ukrajna fl-ewwel siegħat tal-amministrazzjoni tiegħu, issa qiegħed huwa stess jhedded li ma jeskludix li juża l-forza militari u anki ekonomika biex jaħtaf lil gżira tal-Artiklu Greenland, il-Kanal tal-Panama u issa anki l-Kanada.
Huwa mhu qed juri l-ebda sinjal li se jwarrab ix-xewqa tiegħu li l-Istati Uniti jakkwistaw Greenland u l-Kanal tal-Panama, u sejjaħ lit-tnejn li huma bħala kruċjali għas-sigurtà nazzjonali Amerikana.
Mistoqsi jekk jeskludix l-użu tal-forza militari jew ekonomika sabiex jieħu f’idejh it-territorju awtonomu Daniż jew il-Kanal, huwa wieġeb li ma jistax jagħti ebda garanzija fuq l-ebda waħda minn dawn it-tnejn, iżda qal li l-Amerka għandha bżonnhom għas-sigurtà ekonomika tagħha.
Kemm id-Danimarka kif ukoll il-Panama ċaħdu kull suġġeriment li jċedu t-territorju u qalu li se jirreżistu kull attentat f’dan ir-rigward.
Trump wiegħed li juża “forza ekonomika” meta mistoqsi jekk jipprovax jgħaqqad il-Kanada mal-Istati Uniti u sejjaħ il-fruntiera komuni tagħhom bħala linja mfassla b’mod artifiċjali. Il-konfini bejn iż-żewġ pajjiżi hija l-itwal fid-dinja u ġiet stabbilita fi trattati li jmorru lura għat-twaqqif tal-Istati Uniti fl-aħħar tas-snin tal-1700.
Trump qal li l-Istati Uniti tonfoq biljuni ta dollari biex tipproteġil-Kanada, fl-istess waqt li kkritika l-importazzjonijiet ta’ karozzi, injam u prodotti tal-ħalib Kanadiżi. Iżda l-Prim Ministru Kanadiż, Justin Trudeau li ħabbar ir-riżenja tiegħu mill-kariga nhar it-Tnejn li għadda, qal li m’hemmx “lanqas l-iċken ċans” li ż-żewġ pajjiżi jingħaqdu.
Il-konferenza tal-aħbarijiet ta’ Trump inizjalment kienet intiża bħala avviż ta żvilupp ekonomiku biex tiżvela l-investiment ta’ $20 biljun tal-iżviluppatur minn Dubaj, Damac Properties, biex jinbnew ċentri tad-dejta fl-Istati Uniti.
Fost varjetà ta’ affarijiet oħra, huwa ssuġġerixxa li l-Golf tal-Messiku jibdel ismu għal “Golf tal-Amerika” u tenna l-oppożizzjoni tiegħu għall-enerġija mir-riħ, u qal li t-turbini tar-riħ qed “isuqu il-balieni”.
Il-Prim Ministru tad-Danimarka, Mette Frederiksen, sostniet li “Greenland tappartjeni lill-Groenlandiżi” u li l-popolazzjoni lokali biss tista’ tiddetermina d-destin u l-futur tagħha. Hija qablet li Greenland mhix għall-bejgħ, iżda saħqet li d-Danimarka teħtieġ kooperazzjoni mill-qrib mal-Istati Uniti, alleat tan-NATO.
Greenland għandha wkoll uħud mill-akbar depożiti ta ‘minerali rari tad-dinja, li huma kruċjali fil-manifattura ta’ batteriji u apparati ta ‘teknoloġija għolja.
Minn mindu rebaħ l-elezzjoni mill-ġdid Trump ripetutament reġa’ lura għall-idea ta’ espansjoni territorjali tal-Istati Uniti – inkluż it-teħid lura tal-Kanal tal-Panama.
Il-kanal inbena fil-bidu tas-seklu għoxrin u l-Istati Uniti żammew kontroll fuq iż-żona tal-kanal sal-1977, meta trattati nnegozjati taħt il-President Jimmy Carter gradwalment ċedew l-art lura lill-Panama. Waqt li ddeskrieva lil Carter bħala li kien raġel twajjeb, Trump qal li iżda l-għoti tal-Kanal lill-Panama kien żball kbir ħafna min-naħa ta’ Carter.
Mhux ċar kemm il-president elett Trump huwa serju dwar it-tkabbir territorjali tal-Istati Uniti, partikolarment fejn tidħol il-Kanada, pajjiż ta’ 41 miljun ruħ u t-tieni l-akbar nazzjon skond iż-żona fid-dinja.
Waqt il-konferenza tal-aħbarijiet, Trump tenna wkoll għadd ta’ falsitajiet u teoriji ta’ konfoffa strambi, fosthom li Hezbollah, il-grupp militanti Iżlamiku, kien involut fl-irvell tal-Capitol tal-Istati Uniti tal-2021.
