It-tobba fl-Istati Uniti dalwaqt se jiġu avżati biex ma jippreskrivux Tylenol, mediċina kontra l-uġiegħ lin-nisa tqal, qal il-President tal-Istati Uniti Donald Trump, filwaqt li semma rabta kontroversjali bejn il-mediċina u l-awtiżmu.
Il-president tal-Istati Uniti sostna nhar it-Tnejn li t-teħid ta’ Tylenol, magħruf ukoll bħala paracetamol, mhux tajjeb u li n-nisa tqal għandhom jirreżistu b’mod qawwi li jieħduh biss f’każijiet ta’ deni estrem.
L-esperti mediċi rreaġixxew bil-qawwa kontra dawn l-istqarrijiet, b’xi wħud isejħu l-kummenti tal-president Trump bħala perikolużi. Tant hu hekk li l-uffiċjali tas-saħħa fir-Renju Unit enfasizzaw li l-paracetamol jibqa’ l-aktar mediċina sikura disponibbli għan-nisa tqal.
Dr Steven Fleischman, president tal-Kulleġġ Amerikan tal-Ostetriċi u l-Ġnekologi fi stqarrija qal li t-tħabbira tal-president Amerikan “mhijiex appoġġjata mill-korp sħiħ ta’ evidenza xjentifika u tissimplifika b’mod perikoluż il-kawżi numerużi u kumplessi ta’ sfidi newroloġiċi fit-tfal”.
Dan il-grupp ewlieni ta’ professjonisti mediċi qal li t-tobba madwar il-pajjiż identifikaw b’mod konsistenti t-Tylenol bħala wieħed mill-uniċi analġeżiċi sikuri għan-nisa tqal.
Studji li saru fil-passat ma juru l-ebda evidenza ċara li tipprova xi relazzjoni diretta bejn l-użu prudenti tal-aċetaminofen u kwistjonijiet ta’ żvilupp tal-fetu. Il-mediċina hija rakkomandata minn gruppi mediċi ewlenin oħra kif ukoll minn gvernijiet madwar id-dinja.
Tylenol hija marka popolari ta’ mediċina kontra l-uġigħ li tinbiegħ fl-Istati Uniti, il-Kanada u xi pajjiżi oħra. L-ingredjent attiv tagħha huwa l-aċetaminofen, magħruf aħjar bħala paraċetamol barra mill-Amerika ta’ Fuq.
L-aċetaminofen huwa l-aktar għażla sikura kontra l-uġigħ għan-nisa tqal, u mingħajru, in-nisa jiffaċċjaw għażla perikoluża bejn li jsofru minn kundizzjonijiet bħad-deni jew li jużaw alternattivi aktar riskjużi.
Trump għamel it-tħabbira tiegħu flimkien mas-Segretarju tas-Saħħa Robert F Kennedy Jr li qal li l-Food and Drug Administration (FDA) se toħroġ avviż lit-tobba dwar dak li ddeskriva bħala r-riskju potenzjali tat-teħid ta’ Tylenol waqt it-tqala.
Is-Segretarju tas-Saħħa, Robert Kennedy qal li l-FDA se tibda wkoll il-proċess biex tagħmel bidla fit-tikketta tas-sigurtà fuq il-mediċina u tniedi kampanja tas-saħħa pubblika biex xxerred l-għarfien.
Żied jgħid li l-FDA dalwaqt se tapprova l-leucovorin, mediċina li ilha teżisti għexieren ta’ snin tradizzjonalment użata biex tipproteġi lill-pazjenti bil-kanċer kontra t-tossiċità mill-kimoterapija, biex tintuża bħala kura għat-tfal bl-awtiżmu.
Skont il-Kummissarju tal-FDA Marty Makary, l-approvazzjoni se tkun ibbażata fuq riċerka li qal li tissuġġerixxi li l-mediċina tista’ tgħin lit-tfal bl-awtiżmu li huma defiċjenti fil-folate, forma ta’ vitamina B, itejbu l-komunikazzjoni verbali tagħhom.
Iżda r-riċerkaturi wissew li x-xjenza għadha fl-istadji bikrija ħafna, u hemm bżonn ta’ aktar riċerka qabel ma jkunu jistgħu jintlaħqu xi konklużjonijiet sodi.
L-Autism Science Foundation, organizazzjoni tal-karità tal-Istati Uniti, qalet li livelli baxxi ta’ folate waqt it-tqala bikrija ġew marbuta f’xi studji ma’ riskju akbar ta’ awtiżmu fit-tfal, għalkemm is-sejbiet mhumiex konsistenti.