Il-korp governattiv tal-football tal-Amerika t’Isfel, CONMEBOL, qal li l-membri tiegħu mhux se jilagħbu f’Tazza tad-Dinja ta’ kull sentejn.
L-għaqda li tmexxi l-football fid-dinja, il- FIFA, ipproponiet li torganizza Tazza tad-Dinja kull sentejn bħala parti minn kalendarju tal-football imġedded.
Iżda wara laqgħa tal-kunsill, il-CONMEBOL qal li “m’hemm l-ebda raġunijiet, benefiċċji jew ġustifikazzjoni” għall-pjanijiet.
“L-10 pajjiżi li jiffurmaw il-CONMEBOL jikkonfermaw li mhux se jipparteċipaw f’Tazza tad-Dinja organizzata kull sentejn,” żiedet l-istqarrija.
It-Tazza tad-Dinja ilha ssir kull erba’ snin mill-1930, ħlief matul it-Tieni Gwerra Dinjija, u l-membri tal-CONMEBOL jinkludu ir-rebbieħa ħames darbiet, il-Brażil, u l-Arġentina, li rebħuha darbtejn.
F’Diċembru l-FIFA se torganizza summit bil-president Gianni Infantino għadu jittama li jsib kunsens dwar il-pjani.
Il-CAF, il-korp governattiv Afrikan, ta l-appoġġ tiegħu, iżda l-korp governattiv Ewropew, il-UEFA, u l-kampjonati ewlenin tal-Ewropa ddikjaraw l-oppożizzjoni tagħhom.
Dikjarazzjoni ffirmata mill-UEFA u 10 mill-kampjonati tan-nisa Ewropej qalet li l-pjani jkunu “detrimentali profondament” għal-logħba tan-nisa, u l-Kumitat Olimpiku Internazzjonali jemmen li huma ta’ theddida għal sport ieħor u l-ugwaljanza bejn is-sessi.
Wara l-laqgħa tal-CONMEBOL li saret nhar l-Erbgħa fil-Paragwaj, qal li l-proposta tat-Tazza tad-Dinja “tagħti daharha għal kważi 100 sena ta’ tradizzjoni tal-football dinji, u tinjora l-istorja ta’ wieħed mill-aktar avvenimenti sportivi importanti fuq il-pjaneta”.
Il-kunsill tal-CONMEBOL iddeċieda wkoll li l-Kolombja se tospita l-Copa America 2022 għan-nisa.