Spanja ………..3
Costa Rica…….0
Spanja bdew l-avventura tagħhom ta’ dan it-tournament b’rebħa u b’dominanza mill-aktar impressjonanti meta għelbu lil Costa Rica bl-iskor ta’ 3-0.
Huma aċċertaw din ir-rebħa fl-ewwel taqsima meta daħlu jistrieħu b’vantaġġ ta’ tliet goals.
Huma fetħu l-iskor minn auto-goal sfortunat ta’ Valeria del Campo biex żewġ minuti wara Aitana Bonmati rduppjat għall-Ispanjoli.
It-tielet goal wasal, fis-27 minuta, permezz ta’ Esther Gonzalez wara li d-daqqa ta’ ras ta’ Jennifer Hermoso ġiet imċaħħda mill-mimduda.
Gonzalez setgħet skorjat ir-raba’ goal għal Spanja iżda l-penalty tagħha ġie salvat mill-goalkeeper, Daniela Solera, li kienet l-aħjar player tal-logħba bis-saves determinanti tagħha biex żammet l-iskor wieħed rispettabbli għat-team tagħha.
Fit-tieni taqsima, Olga Carmona laqtet il-lasta li iżda setgħet għamlet aħjar.
Id-dominanaza tat-team Spanjol intweriet fl-istatistika tal-partita, hekk kif kellu 46 tentattiv, fosthom 12 fil-mira, bil-Costa Rica, ikklassifikati fis-36 post fid-dinja, kellhom xutt wieħed biss li ntemm barra.
Spanja kellhom ukoll 80% pussess u 22 corner meta mqabbla ma’ wieħed biss mill-avversarji tagħhom.
