Meta ntlagħab it-tielet programm tat-tieni leg tal-Aħħar 16 tal-UEFA Champions League, Atletico Madrid u Benfica kkwalifikaw għall-kwarti-finali meta għelbu lil Manchester United u lil Ajax rispettivament.
B’hekk huma ngħaqdu ma’ Bayern Munich, Liverpool, Manchester City u Real Madrid … biex illum iridu jikkwalifikaw żewġ timijiet oħra biex il-kwadru jkun komplet.
Man Utd v Atletico M. – Barra minn darhom Atletico Madrid għelbu lil Manchester United bl-iskor ta’ 1-0 biex għaddew b’aggregate ta’ 2-1.
Ir-Red Devils amministraw l-ewwel taqsima peró ma tantx kienu daqstant effettivi lejn il-lasti avversarji. Anzi kien il-goalkeeper David De Gea li evita goal ċert meta salva t-tentattiv perikoluż ta’ Rodrigo De Paul li deher dieħel fix-xibka.
Madankollu, fil-41 minuta, l-Ispanjoli fetħu l-iskor meta Renan Lodi kkonkluda bir-ras mill-cross ta’ Antoine Griezmann.
Fit-tieni taqsima, il-United bdew jippressaw għal goal tad-draw u resqu viċin minn Jadon Sancho u Cristiano Ronaldo. Fuq in-naħa l-oħra, Joao Felix kien millimetri bogħod li jixħet fix-xibka iżda naqas li jolqot il-ballun.
Ajax v Benfica – Benfica marru għand Ajax u ħarġu rebbieħa bl-iskor ta’ 1-0 biex ikkwalifikaw b’aggregate ta’ 3-2.
Sa mis-suffara inizjali, Ajax ħarġu jfittxu l-goal u ddominaw għal bosta ħinijiet fejn għamlu minn kollox minbarra skorjaw.
U ta’ dan in-nuqqas huma pattew qares għax fl-uniku attakk denju Benfica skorjaw permezz ta’ Darwin Nunez (77).