Meta beda jintlagħab it-tieni programm tal-ewwel leg tal-Aħħar 16 tal-UEFA Champions League, Chelsea għandhom vantaġġ ta’ 2-0 fuq Lille filwaqt li Juventus ġew miżmuma fi draw ta’ 1-1 minn Villarreal.
Chelsea v Lille – Chelsea għandhom vantaġġ komdu meta f’darhom għelbu lil Lille bl-iskor ta’ 2-0.
Wara seba’ minuti logħob huma fetħu l-iskor meta Kai Havertz patta għaċ-ċans li falla wara tliet minuti minn taħt il-lasti. Din id-darba huwa huwa kkonkluda bir-ras wara li tħalla żmarkat għal kollox mill-corner ta’ Hakim Ziyech.
Peró jekk il-Pensioners taw l-indikazzjoni li kien se jiddominaw dan il-konfront, b’mod gradwali huma għaddew l-inizjattiva lill-avversarji iżda minkejja li gawdew mill-pussess tal-ballun qatt ma mpenjaw serjament lill-goalkeeper Edouard Mendy.
Madankollu fit-63 minuta, Chelsea rduppjaw minn Christian Pulisic wara li rċieva l-ballun minn N’Golo Kante wara azzjoni personali.
Villarreal v Juventus – Minkejja li Juventus sfaw miżuma fi draw ta’ 1-1 xorta jibqgħu favoriti li jgħaddu għar-round li jmiss meta issa jilagħbu f’darhom.
Huma ma setgħux kellhom bidu aħjar meta wara biss 3s sekonda fetħu l-iskor permezz tad-debuttant Serb, Dusan Vlahovic, meta kkontrolla b’sidru mill-cross ta’ Danilo u dar mill-ewwel biex xeħet fix-xibka.
Ir-reazzjoni tal-Villarreal waslet fit-13-il minuta meta Giovani Lo Celso għeleb għal kollox lill-goalkeeper iżda ġie mċaħħad mill-wieqfa.
Villarreal ippruvaw jippressaw biex jiksbu l-goal tad-draw iżda Juventus ikkontrollaw kull sitwazzjoni biex daħlu jistrieħu fil-vantaġġ.
Juventus kellhom bidu qawwi tat-tieni taqsima u setgħu faċlment għalqu l-partita meta fallew żewġ ċansijiet faċli minn Alvaro Morata u Vlahovic.
Ta’ dan in-nuqqas pattew qares minħabba li, fis-66 minuta, l-Ispanjoli kisbu d-draw minn Daniel Pajero li kkonkluda mill-pass ta’ Etienne Capoue.