Illum u għada jintlagħab it-tieni programm tal-ewwel leg tal-Aħħar 16 tal- UEFA Champions League fejn l-attenzjoni prinċipali tkun dik bejn Atletico Madrid u Manchester United, filwaqt partiti oħra intressanti huma dawk bejn Chelsea u Lille u Villarreal u Juventus.
Chelsea v Lille – Chelsea, li spiċċaw fit-tieni post ta’ Grupp H, jilqgħu lil Lille li rebħu Grupp G.
Friski mis-suċċess tat- Tazza tad-Dinja tal-Clubs, il-Pensioners jibdew favoriti hekk kif ġejjin minn ritmu ta’ ħames rebħiet konsekuttivi.
Min-naħa tal-Franċiżi, wara bidu tajjeb tal-istaġun huma tilfu l-konsistenza mas-sena l-ġdida biex jinsabu fil-11-il post fil-klassifika tal-kampjonat domestiku. Fl-aħħar partita huma spiċċaw fi draw ta’ mingħajr goals kontra Metz li jinsabu fil-qiegħ tal-klassifika.
Chelsea se jkunu mingħajr l-imweġġgħin Mason Mount, Ben Chilwell u Reece James filwaqt li Cesar Azpilicueta u Callum Hudson-Odoi huma dubjużi.
L-uniku player nieqes għal Lille huwa Angel Gomes.
Villarreal v Juventus – Juventus, rebbieħa ta’ Grupp H, imorru jilagħbu għand Villarreal li spiċċaw fit-tieni post ta’ Grupp F.
Il-Bianconeri jridu jinsew ir-riżultat ta’ draw ta’ 1-1 kontra Torino u jikkonċentraw fuq din il-partita hekk delikat.
Huma mistennija jagħtu d-debutt lill-attakkant Serb Dusan Vlahovic (Fiorentina) l-midfielder Svizzeru Denis Zakaria (Borussia M.)
Peró huma għandhom lista ta’ players li qed jirkupraw minn injury li jinkludu lil Federico Chiesa, Leonardo Bonucci u Giorgio Chiellini filwaqt li Paulo Dybala, Luca Pellegrini u Daniel Rugani huma dubjużi.
Min-naħa tal-Ispanjoli, dawn ukoll se jkollhom jgħaddu mingħajr bosta players li jinsabu mweġġgħin, fosthom Francis Coquelin, Gerard Moreno u Ruben Pena filwaqt li Giovanni Lo Celso u Etienne Capoue jrid isirlu test aħħari.
Benfica v Ajax – Benfica, li spiċċaw fit-tieni post ta’ Grupp E jilagħabu kontra Ajax li rebħu Grupp C b’punti massimi.
Benfica jinsabu maqtugħin mill-isfida għar- rebħ tat-titlu domestiku u għaldaqstant iridu jkomplu javvanzaw f’din il-kompetizzjoni għal pakkett finanzjarju.
Min-naħa l-oħra, Ajax qed jiddominaw ix-xena lokali minkejja li fl-aħħar partita kellhom jitħabtu biex għelbu lil Willem II bl-iskor ta’ 1-0.
Benfica għandhom erba’ players imweġġgħin li huma Almeida, Lucas Verissimo, Pinho u Haris Seferovic.
Min-naħa ta’ Ajax, dawn se jkunu mingħajr Brian Brobbey, Sean Klaiber u Maarten Stekelenburg.
Atletico M. v Man Utd – Manchester United, li rebħu Grupp F, imorru għand Ateltico Madrid li spiċċaw fit-tieni post ta’ Grupp B.
Inċidentalment, fix-xena domestika ż-żewġ timijiet qed jisfidaw biex itemmu mal-ewwel erba’ timijiet hekk kif wieħed jista’ jgħid li s’issa ddiżappuntaw matul l-istaġun.
Filwaqt li Atletico Madrid jinsabu fil-ħames post, ir-Red Devils qed jokkupaw ir-raba’ post u għandhom sfida minn West Ham, Arsenal, Wolves u Tottenham.
L-Ispanjoli għandhom bosta players neqsin fosthom Matheus Cunha, Thomas Lemar, Benjamin Lecomte, Daniel Wass iżda mistenni jirritorna Antoine Griezmann. Yannick Carrasco huwa sospiż.
Il-players huma kollha disponibbli għar-Red Devils bl-eċċezzjoni ta’ Edinson Cavani li se jsirlu test aħħari għax dubjuż.