Illum u għada jintlagħbu ż-żewġ programmi l-oħra tat-tieni leg tal-Aħħar 16 tal-UEFA Champions League fejn l-aktar żewġ partiti li jinteressaw lilna l-Maltin huma bejn Manchester United u Atletico Madrid … u Juventus v Villarreal li spiċċaw fi draws identiċi ta’ 1-1 u għaldaqstant kollox għadu miftuħ beraħ.
Fiż-żewġ logħbiet l-oħra, Ajax jospitaw lil Benfica (2-2) filwaqt li Chelsea jmorru għand Lille b’vantaġġ ta’ 2-0.
Man Utd v Atletico M. – Manchester United jilqgħu lil Atletico Madrid fejn jimmiraw li “jsalvaw” l-istaġun billi jkomplu javvanzaw f’din il-kompetizzjoni.
Fl-ewwel leg huma spiċċaw fi draw ta’ 1-1 fejn ir-Red Devils salvaw il-partita b’goal ta’ Anthony Elanga wara li Joao Felix fetaħ l-iskor għall-Ispanjoli.
Huma mistennija jkunu bl-aqwa formazzjoni possibbli fejn se jirritornaw Bruno Fernandes, Luke Shaw u Scott McTominay, wara li kienu neqsin fir-rebħa ta’ 3-2 fuq Tottenham fil-Premier League Ingliż.
Min-naħa tiegħu, Diego Simeone ma jistax jinkludi lil Yannick Carrasco li hu sospiż filwaqt li Matheus Cunha, Daniel Wass, Sime Vrsaljko, Thomas Lemar, Mario Hermoso u Geoffrey Kondogbia għadhom mweġġgħin.
Ajax v Benfica – Din il-partita hija waħda bilanċjata għalkemm Ajax jibdew favoriti li jgħaddu minħabba li se jkunu qed jilagħbu quddiem il-partitarji tagħhom stess wara li temmew fi draw ta’ 2-2 fl- ewwel leg.
Minkejja f’darhom, Benfica bdew jiġru wara r-riżultat meta l-Olandiżi skorjaw minn Dusan Tadic u Sebastian Haller wara li l-istess player ikkommetta auto-goal bil-goal l-ieħor għall-Portugiżi jasal minn Roman Yaremchuk.
Il-coach Erik Ten Haag ma għandu l-ebda problemi ta’ players neqsin iżda Yaremchuk huwa dubjuż għal Benfica filwaqt li se jkollhom jgħaddu mingħajr is-servizzi tal-imweġġgħin, Haris Seferovic u Rodrigo Pinho.
Lille v Chelsea – Minkejja li huma mifnijin minn problemi amministrattivi u saħansitra sanzjonati mill-gvern Ingliż, iċ-champions Ewropej Chelsea jmorru jilagħbu għand Lille fejn jieħdu magħhom vantaġġ ta’ 2-0 liema goals ġew skorjati minn Kai Havertz u Christian Pulisic.
Il-Pensioners ġejjin minn rebħa ta’ 1-0 fuq Newcastle f’dik li kienet msemmija bħala l-”logħba tal-mistħija” minħabba li ż-żewġ clubs huma mmexxija minn sidien mixlijin li appoġġaw ħasil ta’ flus u saħansitra qtil … b’dak li qed iseħħ fir-Russja kif ukoll bil-qtil u b’dak li qed jiġri fl-Arabja Sawdita dwar id-drittijiet tal-bniedem u bl-assassinju tal-ġurnalist famuż, Jamal Khashoggi.
Intant, Lille ma tantx għaddejjin minn mument tajjeb fejn wara li rebħu l-kampjonat fl-istaġun li għadda, bħalissa jinsabu fis-sitt post tal-klassifika ta’ Ligue 1.
Huma ġejjin minn draw diżappuntanti ta’ 0-0 kontra St Etienne f’darhom.
Chelsea għandhom lil Ben Chilwell imweġġa’ filwaqt li Romelu Lukaku mistenni jitħalla barra biex minfloku jilgħab Timo Werner.
Juventus v Villarreal – Juventus għandhom ostaklu diffiċli meta jilqgħu lil Villarreal wara li fl-ewwel leg temmew fi draw ta’ 1-1.
Dan huwa wkoll konfront bejn żewġ coaches li rebħu bosta unuri u ma għandhom bżonn tal-ebda introduzzjoni – Massimiliano Allegri u Unai Emery.
Il-Bianconeri għandhom lista ta’ players imweġġgħin li jinkludu lil Federico Bernardeschi, Federico Chiesa u Giorgio Chiellini filwaqt li Danilo mistenni jirritorna.
Min-naħa tal-Ispanjoli, dawn ma jistgħux jinkludu lil Gerard Moreno, Francis Coquelin u Ruben Pena għax qed jirkupraw minn injury filwaqt li Giovani Lo Celso huwa dubjuż.
