Meta ntlagħab l-ewwel programm tat-tieni leg tar-round tal-Aħħar 16 tal-UEFA Champions League, Liverpool u Bayern Munich saru l-ewwel żewġ timijiet li għaddew għall-kwarti-finali meta għelbu b’aggregate lil Inter u lil Salzburg rispettivament.
Liverpool v Inter – Minkejja li sfaw megħluba minn Inter bl-iskor ta’ 1-0, Liverpool ikkwalifikaw għall-kwarti-finali b’aggregate ta’ 2-1.
Wara bidu bilanċjat kienu r-Reds li resqu viċin li jiftħu l-iskor meta fil-31 minuta d-daqqa ta’ ras ta’ Joel Matip ġiet imċaħħda mill-mimduda u minuta wara Milan Skriniar salva d-daqqa ta’ ras ta’ Virgil van Dijk minn fuq il-linja fatali.
Fit-52 minuta kien imiss lil Mohamed Salah li jiġi mċaħħad minn sieq il-lasta.
Ta’ dan in-nuqqas kien Lautaro Martinez (62) li fetaħ l-iskor għal Inter. Iżda minuta wara tkeċċa Alexis Sanchez għat-tieni karta safra wara foul fuq Fabinho.
Fis-78 minuta Salah reġa’ laqat il-lasta biex Liverpool ma setgħux jiskorjaw. Lejn it-tmiem Arturo Vidal salva goal ċert fuq Luis Diaz.
Bayern M. v Salzburg – Bayern Munich għaddew mal-aħħar tmienja meta għelbu lil Salzburg 7-1 għal aggregate ta’ 8-2.
Kienu Salzburg li ħarġu tajjeb biex jippruvaw jixħtu l-pressjoni fuq Bayern iżda kienu dawn tal-aħħar li fetħu l-iskor fit-12-il minuta meta ngħataw penalty meta Robert Lewandowski twaqqa’ fil-kaxxa minn Max Wober biex mill-11-il metru l-attakkant Pollakk ma żbaljax.
Seba’ minuti wara, seħħet azzjoni foto-kopja meta l-istess Wober rega’ waqqa’ lil Lewandowski fil-kaxxa u permezz tal-VAR ingħataw penalty ieħor u Robert Lewandowski ma ħafirx.
Demoralizzat u diżullużi għall-aħħar, l-Awstrijaċi naqsu milli jirriorganizzaw biex fit-23 minuta, Robert Lewandowski skorja t-tielet goal personali u t-tielet għal Bayern.
Il-goals l-oħra waslu minn Serge Gnabry (31), doppjetta ta’ Thomas Muller (54, 83) u Leroy Sane (85) filwaqt li Maurits Kjaergaard (70) wieġeb għal Salzburg.
