Illum u għada jintlagħbu l-ewwel żewġ programmi tat-tieni leg tal-Aħħar 16 tal-UEFA Champions League fejn Manchester City u Liverpool jibdew favoriti li jkomplu javvanza għall- kwarti-finali hekk kif rebħu l-ewwel leg barra minn darhom kontra Sporting Lisbon u Inter rispettivament.
Dan filwaqt li l-partiti bejn Bayern Munich v Salzburg u Real Madrid v Paris St-Germain huma miftuħin beraħ.
Bayern M. v Salzburg – Bayern Munich jilqgħu lil Salzburg f’konfront mill-aktar delikat wara li fl-ewwel leg kellhom wirja diżappuntanti mingħajr ma jitnaqqas l-ebda mertu lill-Awstrjaċi.
Kellu jkun Kingsley Coman li salva r-riżultat għall-Bavarjani wara li Chukwubuike Adamu kien poġġa lil Salzburg fil-vantaġġ.
Bayern se jkollhom neqsin lil Corentin Tolisso, Manuel Neuer, Alphonso Davies u Leon Goretzka li għadhom mweġġgħin b’Thomas Muller mistenni jirritorna wara li kien ma jiflaħx.
Salzburg għandhom lista twila ta’ players mhux disponibbli – Albert Vallci, Sekou Keita, Ousmane Diakite, Bryan Okoh, Benjamin Sesko, Jerome Onguene, Noah Okafor u Oumar Solet.
Liverpool v Inter – Liverpool jibdew b’vantaġġ ta’ żewġ goals meta jilqgħu lil Inter u għaldaqstant jibdew favoriti li jaqtgħu l-passaġġ tagħhom għar-round li jmiss.
Huma jridu juru rispett massimu lejn l-avversarji tagħhom konxji mill-fatt tal-qawwa tagħhom fejn fl-ewwel leg iddominaw għal bosta ħinijiet minkejja li Roberto Firmino u Mohamed Salah taw ir-rebħa lir-Reds.
Il-manager ta’ Liverpool, Jurgen Klopp, jista’ wkoll jagħmel użu mit-tliet players, Thiago Alcantara, Roberto Firmino u Joel Matip, wara li niżlu għat-taħriġ ma’ sħabhom.
Min-naħa tan-Nerazzurri, għandhom lil Nicoló Barella sospiż filwaqt li Ivan Perisic irid isirlu test aħħari.
Man City v Sporting – Din il-partita hija biss formalitá hekk kif il-manager ta’ Manchester City, Pep Guardiola, mistenni jserraħ bosta players wara li fl-ewwel leg huma għelbu lil Sporting Lisbon bl-iskor ta’ 5-0 fil-Portugall.
Bħalissa, is-Citizens jinsabu għaddejjin minn vena mill-aqwa u proprju nhar il-Ħadd li għadda l-ġirien Manchester United kienu l-aħħar vittmi meta għelbuhom bl-iskor ta’ 4-1 fil-Premier League Ingliż … fejn huma wkoll fost il-favoriti li jirbħu din il-kompetizzjoni.
Guardiola se jkollu jgħaddi mingħajr is-servizzi ta’ Ruben Dias li qed jirkupra minn injury filwaqt li Zack Steffen, Nathan Ake u Cole Palmer huma dubjużi.
Sporting Lisbon għandhom lil Matheus Nunes sospiż filwaqt li Daniel Braganca, Joao Palhinha u Pote jinsabu mweġġgħin.
Real Madrid v Paris St- Germain – Fl-aqwa partita, Real Madrid jittamaw li jdawru telfa ta’ 1-0 kontra Paris St-Germain bil-goal ta’ dawn tal-aħħar jasal proprju fl-aħħar azzjoni tal-logħba minn Kylian Mbappe.
Dan huwa konfront miftuħ għal kull riżultat u għaldaqstant, il-fatt li r-regola tal-goals away li jgħoddu doppju m’għadhiex teżisti kollox huwa possibbli.
Filwaqt li t-timijiet huma fost l-aktar qawwija fl-Ewropa u t-tnejn qed jillidjaw il-klassifiki tal-kampjonati domestiċi, il-Madrileni se jkollhom il-vantaġġ li se jkunu qed jilagħbu quddiem il-partitarji tagħhom stess. Ferland Mendy u Casimero huma sospiżi filwaqt li Toni Kroos għadu qed jirkupraw minn injury fil-hamstring.
Għall-Pariġini, l-eks Sergio Ramos, Leandro Paredes u Ander Herrera, se jkunu neqsin ukoll.
