Meta t-Tlieta intlagħab l-ewwel programm tal- ewwel leg tal-kwarti-finali tal-UEFA Champions League, Liverpool u Manchester City għandhom vantaġġ meta għelbu lil Benfica (3-1) u lil Atletico Madrid (1-0).
Benfica v Liverpool – Liverpool marru għand Benfica u ħarġu rebbieħa bl-iskor ta’ 3-1 wara li fl-ewwel taqsima ddominaw iżda wara l-mistrieħ kellhom jitħabtu sakemm skorjaw it-tielet goal.
L-ewwel azzjoni perikoluża waslet min-naħa ta’ Liverpool eżattament fl-10 minuta meta Sadio Mane għadda bit-takkuna lejn Mohamed Salah li l-konklużjoni tiegħu ġiet salvata bis-sieq mill-goalkeeper Odisseas Vlachodimos.
Madankollu seba’ minuti wara, ir-Reds fetħu l-iskor meta Ibrahima Konate kkonkluda bir-ras mill-corner ta’ Andrew Robertson.
Huma komplew jiddominaw bil-Portugiżi jirtiraw lura biex jassorbu l-pressjoni tal-avversarji u bdew jippruvaw joperaw bil-kontrattakki.
Naby Keita u Mohamed Salah fallew żewġ okkażjonijiet faċli f’temp ta’ ftit minuti.
Iżda, fl-34 minuta, Liverpool irduppjaw meta l-cross ta’ Trent Alexander-Arnold sab lil Luis Diaz li kompla bir-ras lejn Sadio Mane li bil-kalma kollha rtokka l-ballun fix-xibka.
Fil-ħin miżjud tal-ewwel taqsima, Vlachodimos evita goal ċert meta salva t-tentattiv ta’ Mohamed Salah li ħarab waħdu f’kontrattakk veloċi … fejn seta’ għalaq il-logħba.
Ta’ dan in-nuqqas huma pattew qares minħabba li erba’ minuti mill-ftuħ tat-tieni taqsima Benfica naqqsu l-marġni tal-iskor meta żball fid-difiża tar-Reds ippermetta lil Rafa Silva jgħaddi lil Darwin Nunez li għeleb għal kollox lil Alisson
U fit-62 minuta l-istess Alisson kien providenzjali għar-Reds meta salva x-xutt ta’ Everton mill-viċin.
Wara dan il-goal, Benfica żiedu l-isforzi tagħhom biex jiksbu d-draw iżda kien Luis Diaz li ssiġilla r-rebħa għat-team immexxi mill-manager, Jurgen Klopp … u favoriti li jgħaddu għas-semi-finali.
Man City v Atletico Madrid – F’partita mill-aktar diffiċli, Manchester City irnexxielhom jegħlbu lil Atletico Madrid bl-iskor ta’ 1-0.
Wara kwarta logħob Manchester City appellaw għal penalty meta Koke deher jagħmel kuntatt ma’ Bernardo Silva fil-kaxxa iżda wara verfikazzjoni mal-VAR il-kuntatt kien wieħed minimu.
Għalkemm is-Citizens kienu l-aħjar team huma sabu quddiemhom difiża dixxiplinata li għalqet l-ispazji kollha neċessarji biex l-Ingliżi sabuha ferm diffiċli biex jippenetraw bil-konsegwenza li rari mpenjaw lill-goalkeeper avversarju Jan Oblak.
Lejn tmiem l-ewwel taqsima Manchester City ipprotestaw għal penalty ieħor meta Kevin De Bruyne deher jaqa’ bejn żewġ difensuri. Iżda fil-veritá waqa’ mingħajr l-ebda kuntatt u għaldaqstant il-coach ta’ Atletico, Diego Simeone, beda jipprotesta biex De Bruyne jiġi muri l-karta safra għal simulazzjoni.
Żewġ minuti mill-ftuħ tat-tieni taqsima, Manchester City resqu viċin permezz ta’ Ilkay Gundogan li iżda ġie antiċipat fil-ħin minn Savic biex seta’ jagħmel xi forma ta’ ħsara.
Fil-55 minuta, kellu jkun Oblak li ċaħħad li De Bruyne li deher li seta’ jiskorja.
Fl-64 minuta, Aymeric Laporte resaq viċin iżda minn pożizzjoni ideali d-daqqa ta’ ras tiegħu kienet dgħajfa.
Peró fis-70 minuta huma fetħu l-iskor minn Kevin De Bruyne li xeħet fir-rokna tax-xibka wara li rċieva mingħand Phil Foden.
